El Principáu llanza un programa con rutes pa conocer el patrimoniu de la comunidá
01 jul 2022 . Actualizado a las 05:00 h.Diez rutes, de la cultura al paisaxe, dende la costa al monte, con tola variedá del abanicu d'ufierta d'ociu d'Asturies, son les propuestes del programa ‘D'itinerarios poñel Patrimoniu’ que llanzó'l Principáu pa esti branu.
La celebración de los 1.300 años de la Batalla de Cuadonga, el Xacobéu y el Camín de los Santuarios van ser dalgunos de los destinos con mayor protagonismu esta edición con percorríos que van empezar esti sábadu 2 de xunetu.
Los participantes pueden visitar los monumentos que'l pelegrín atopa n'Uviéu, enfusase na cultura sidrera, percorrer Los Ozcos y realizar la ruta d'A Seimeira o pasiar pela Contorna del Nora y pela Ruta Minera de Xovellanos.
Tamién va haber rutes pel Camín del Salvador dende l'Altu Ayer, per Arenas (Cabrales) y el Valle Altu de Peñamellera, pel Parque Natural de Redes, per Ponga y Piloña, per Somiedo y per Cangues d'Onís, onde se va visitar el Santuariu y la Basílica de Cuadonga y va realizase amás parte de la Ruta de les Pelegrinaciones.
Les entraes pa participar en cada itinerariu, con places llendaes, tienen un preciu de 18 euros o de 15 euros pal públicu infantil ente 4 y 11 años, grupos de más de 10 persones, visitantes con pasaporte cultural o con tarxeta del Club Cultura Principáu d'Asturies.
Les rutes empiecen el 2 de xunetu con «Uviéu nes pelegrinaciones»; el 9 de xunetu: «Camín del Salvador dende l'Altu Ayer»; el 16 de xunetu: «Arenas y Peñamellera Alta»; el 23 de xunetu: «Parque Natural de Redes», y el 30 de xunetu: «La Contorna del Nora».
Siguen el 6 d'agostu cola Cultura sidrera»; el 13 d'agostu: «Ponga y Piloña»; el 27 d'agostu: «Los Ozcos»; el 10 de setiembre: «Cangues d'Onís», y el 24 de setiembre: «Seronda nel Parque Natural de Somiedo».