La infraestructura nueva, construyida en madera de castañal, tien un altor de 7 metros y ronda los 500 quilos de pesu
04 jul 2022 . Actualizado a las 16:13 h.La Comisión de Festexos de Cangas (Cofeca) decidió recuperar el diseñu de la bola que tradicionalmente s'instala nel centru de la ponte romana mientres los festexos. «Recuperemos el diseñu orixinal, que foi instaláu per primer vegada en 1896, según pudimos comprobar nes cróniques de la dómina», indicó esta mañana la conceyala de Festexos de Cangas y presidenta de Cofeca, Laura Álvarez, que detalló que la idea de recuperar esti emblemáticu símbolu, surdió de David Álvarez de Adralés, miembru de la directiva d'Artesanos.
Nun principiu plantegóse la posibilidá de facer una colecta popular pa llograr recuperar el diseñu orixinal, pero finalmente la comisión de festexos fízose cargu de los gastos de la so construcción. Tou un emblema pa Cangas, qu'esta mañana yá llamaba l'atención de los más interesaos, que nun duldaron n'averase a la redoma de la ponte pa siguir el procesu del so allugamientu, que va permitir recuperar esti emblema na tradicional Descarga, que da empiezu'l próximu 16 de xunetu. El diseñu nuevu, amás, «pretende ser lo más fiel al orixinal, anque sabemos que nun va ser una réplica exacta, una y bones los documentos gráficos qu'esisten, nun son de bona calidá».
La construcción nueva cuenta con un altor de 7 metros, dos más que la que se conocía hasta agora, calteniendo na bola los trés colores: coloráu, azul y mariellu, qu'al entemecelos formen el marrón carmelita, tan característicu de la Virxe del Carme, y que ye enseña tanto de la Sociedá de Benefactores de la Virxe del Carmen como de la Sociedá d'Artesanos.
La farola nueva foi construyida en madera de castañal por Maderas Menéndez na sierra de Vallinas. El so pesu ronda los 500 quilos y ta suxetada por cuatro columnes que sostienen la base de la cúpula con cuatro vigues, onde se va instalar la esfera y l'antiguu soporte xiratoriu que va ser impulsáu peles agües del ríu Luiña.
Los arcos trilobulaos son una de les partes que más llamen l'atención d'esta infraestructura, que remata col allugamientu nes cuatro esquines de la base de banderes d'Asturies y d'España, amás de banderinos de les sociedaes encargaes de rindir tributu a la virxe del Carme: los Artesanos y les Benefactores del Carme.
Cuatro esquines que tamién van contar con llume, que se caltuvo de la tradicional puesta n'escena de los farolucos con veles, que s'instalaben d'antiguo nes fiestes pela villa, primero que llegara a Cangas la lletricidá, poro, el nome d'esta infraestructura que remata la ponte romana nes fiestes, tamién ye conocida como la farola, yá que na so inauguración orixinal sorprendió a los y les cangueses col so llume, que creaba una dinamu coles agües del ríu, según los datos recoyíos por Manuel Álvarez Pereda de Tous pa Tous.