«Ana María. La llobera d'Asturies», premiu Alfonso Iglesias de cómic n'asturianu

LA Voz REDACCION

AGORA

XURXO MARIÑO

El xuráu destaca la recuperación d'una figura de muyer silenciada, la calidá gráfica y l'apueste pola riqueza llingüísta del trabayu del autor mozu Guillermo Menéndez Quirós

05 jul 2022 . Actualizado a las 12:56 h.

La edición decimocuarta del Premiu Alfonso Iglesias de cómic n’asturianu fallóse ayeri en favor del autor mozu Guillermo Menéndez Quirós cola obra Ana María. La Llobera d’Asturies. Nel acta del fallu, el xuráu destaca «la recuperación d’una figura de muyer de la historia d’Asturies, silenciada pola historia oficial, la calidá gráfica tan notable y l’usu intelixente del color del proyectu, fechu con una técnica narrativa contemporánea; y l’apueste pola riqueza llingüística d’Asturies, al reflexar les variantes orientales de la llingua».

El xuráu quixo valorar tamién la calidá de les propuestes presentaes y la participación alta, equiparable a otros certámenes del Estáu. El xuráu d’esta edición presidiólu’l director xeneral de Política Llingüística, Antón García, y integráronlu les ilustradores Carmen Peña Calvo y Mónica García Jiménez, la filóloga Claudia Elena Menéndez, la llibrera especializada en cómic María Fente y el dibuxante y ganador de la edición del añu pasáu, Ángel de la Calle. Actuó como secretaria Laura Marcos, filóloga de la Dirección General de Política Llingüística.

Guillermo Menéndez Quirós (La Felguera, 1994) ye autor de cómic y novela gráfica. Formóse na Escuela d’Arte d’Uviéu, na Facultá de Belles Artes de Salamanca y na del País Vascu. En Bilbao empezó a desarrollar el so interés pol cartelismu y la historieta, lo que lu llevó a collaborar en dellos fanzinos y revistes, p’acabar desenvolviendo la propia obra. Ye autor de Galdós. Un escritor en Madrid (2020), Milicias vascas antifascistas (2021); Herederos de Euskalduna (2.u puestu nel concursu de cómic del Muséu Marítimu de Bilbao) y Desindustrialización y resistencia (accésit nel concursu Art Nalón). Anguaño alcuéntrase volcáu na novela gráfica viniente: Cumbres en pie de guerra. La batalla del Mazucu, sobre l’episodiu más representativu de la resistencia republicana cuando la cayida del Frente Norte.