Más de 20 músicos van xubir al escenariu pa fusionar rock y gaita nel que promete ser el conciertu del branu nos Valles del Osu
07 jul 2022 . Actualizado a las 11:31 h.La Banda Gaites Camín de Fierro de los conceyos de Proaza, Santo Adriano y Teberga va estrenar el so discu nuevu Rock & Fierro esti sábadu 9 de xunetu nun conciertu en Proaza. La propuesta de fusión de gaita y rock va axuntar a más de 20 esperimentaos músicos sobre l'escenariu. Na composición de temes del discu collaboraron artistes como Jorge Otero, Pablo Moro, Toli Morilla y Xune Elipe, ente otros y la iniciativa cuenta col encontu del Conceyu de Proaza y la Conseyería de Cultura, al traviés del programa Cultura en Rede.
El director de la Banda, Balbino Menéndez, espera que'l conciertu pueda axuntar a un bon númberu de siguidores tanto de la música celta como'l rock, nun espectáculu únicu y pioneru n'Asturies. «Esti trabayu tien l'oxetivu de llegar a un públicu más allá del propiu de les bandes de gaites y pa ello propón una importante presencia de temes vocales, lo mesmo que de temes instrumentales de composición nueva», esplicó.
La cita va ser esti sábadu, a les 22.30 hores, nel polideportivu de Proaza. El conciertu va retresmitise en streaming y l'asociación d'hostelería llocal preparó paquetes especiales d'agospiamientu p'acoyer a los asistentes a lo llargo de la fin de selmana.