Visites y demostraciones de forxa y tornería esti branu nel Muséu de Grandas de Salime

La Voz

AGORA

Museo Etnográfico de Grandas de Salime
FlickrMuseo Etnográfico de Grandas de Salime CC BY-SA 2.0

Fadrán percorríos temáticos pa conocer la vida cotidiana de la sociedá llabradora del occidente asturianu

07 jul 2022 . Actualizado a las 11:28 h.

Xuegos, visites guiaes, demostraciones de forxa y tornería y la esposición Frente por frente. Dos visiones de la Guerra Civil son les propuestes d'esti branu nel Muséu Etnográficu de Grandas de Salime Pepe'l Ferreiro, centru dependiente de la Conseyería de Cultura, Política Llingüística y Turismu, xestionáu pola Sociedá Pública de Xestión Turística y Cultural del Principáu d'Asturies.

En xunetu y agostu realícense dos visites guiaes distintes: los miércoles van facese percorríos temáticos pa conocer les característiques y usos de los horros, paneres y cabazos, elementos constructivos que pueden vese nel centru y que permitíen a les families llabradores almacenar y caltener colleches y alimentos; y los vienres, visites pelos más de 3.000 metros cuadraos del Muséu pa conocer los oficios y vida cotidiana de la sociedá llabrador del occidente asturianu.

De la mano d'Arturo Iglesias, va haber demostraciones de forxa, ún de los oficios con mayor demanda nes comunidaes llabradores tradicionales, tolos miércoles y vienres del 15 de xunetu al 14 de setiembre; y demostraciones de tornería pa conocer el funcionamientu del tornu de media vuelta tolos martes y xueves del 19 de xunetu al 15 de setiembre.

Amás, el públicu va poder conocer y poner a prueba les sos habilidaes con xuegos tradicionales como la llave, la peonza, los zancos o la ferradura nel espaciu al aire llibre del Muséu y visitar hasta'l 30 de setiembre l'amuesa fotográfica Frente por frente. Dos visiones fotográfiques de la Guerra Civil, con imáxenes de Florentino López Floro y Constantino Suárez.

Esta esposición, que cuenta cola collaboración del Muséu del Pueblu d’Asturies y de la Rede de Museos Etnográficos d'Asturies, inclúi 40 fotografíes y un audiovisual con otres 40 imáxenes adicionales sobre distintos aspeutos de la vida de la guerra n'Asturies, tanto de civiles como de combatientes, ente xunetu de 1936 y ochobre de 1937, cuando la cayida de Xixón supunxo l'esbarrumbe definitivu del Frente Norte republicanu.