L' autor va participar nel Veranu Lliterariu col cuentu «Lin quier esnalar»
10 jul 2022 . Actualizado a las 11:35 h.Nesti 2022 el Veranu Lliterariu, una iniciativa del Serviciu de Normalización Llingüística de Corvera que cumple la décima edición, torna p’averar la lliteratura infantil n’asturianu a la reciella corverana. El llunes 11 de xunetu va tener la vez nesta actividá l’escritor Lluis Aique Iglesias.
Lluis Aique Iglesias (Sotrondio, 1967) ye profesor, escritor y traductor; foi ganador nel 2018 del premiu «María Xosefa Canellada» de lliteratura infantil y xuvenil cola obra Invisible y del «Premiu Radagast de novela 2021» con «La vieya», amás d’otros concursos lliterarios. Cola editorial Pintar-Pintar publicó llibros dirixíos al públicu infantil, casu de «Lin quier esnalar» o «Lin xube al carabín».
Lluis Aique Iglesias va participar nel Veranu Lliterariu col cuentu «Lin quier esnalar», un cuentu oníricu que nos presenta a Lin, un neñu que quier esnalar pero que nun tien ales y que nun sabe que’l vuelu, igual que la vida, vien ensin instrucciones.
L’alcuentru ente l’escritor y la reciella de Corvera va facese’l llunes 11 de xunetu a les 11:30 hores nel Salón d’Actos del Centru Sociocultural de Les Vegues y l’asistencia ye llibre y de baldre.