El preciu d'esti tipu de vehículos xubió'l 21,5% nel últimu añu na comunidá
13 jul 2022 . Actualizado a las 05:00 h.Asturies lideró en xunu'l ranquin de les comunidaes autónomes colos coches d'ocasión más caros, con una media de 20.701 euros, rexistrando una xuba del 21,5 % nel últimu añu, según los datos espublizaos pol portal coches.net.
El preciu mediu d'ufierta del coche d'ocasión rexistró un nuevu récord históricu n'España de 19.719 euros tres una xuba nel mes de xunu del 17,2% frente al mesmu mes del añu pasáu, colo que s'atropen doce meses consecutivos de xubíes de dos díxitos.
Según esti portal, el presupuestu mediu que remana un potencial comprador ye de 17.700 euros, 2.000 euros menos que'l preciu mediu actual del vehículu d'ocasión, fechu qu'obliga a los veceros a adquirir coches más antiguos de lo que desearíen. Sicasí, les ventes aumentaron un 6,6 % frente al mes anterior, anque fueron un 2,9 % inferiores a les del añu pasáu.
La tasa interañal del preciu mediu de los vehículos d'ocasión empezó a crecer percima del 10% en xunu de 2021, cuando'l sector empezó a vese afectáu pola falta de microchips pa los coches nuevos.
Por comunidaes autónomes los precios más altos correspuenden a Asturies, con 20.701 euros; Cataluña, con 20.666, y Canaries, con 20.571, ente que nel otru estremu asítiense Estremadura, con 16.495; Cantabria, con 17.597, y La Rioxa, con 17.996, informa EFE.