Alberto Núñez Feijóo diz que la propuesta de becar a les families con rentes mui altes que lleven a los sos fíos a los meyores centros privaos en perxuiciu de les families de clase media o baxa que lleven a los d’elles a los centros públicos ye un «discutiniu razonable» porque «siempre» pue debatise cuál ye’l «umbral de renta adecuada» pa concedeles. Ello ye que tendría que desplicar cómo pue considerase families de clase media a quien tengan ingresos de más de 100.000€ euros añales y cómo puen competir con elles les families con ingresos mensuales de 1.500€. En realidá, el señor Feijóo persabe que nun hai discutiniu posible nuna situación tan asimétrica que vien precedida de l’ausencia de la igualdá.
Señor Feijóo, la oposición madrilana, depués de que’l gobiernu d’esa Comunidá (onde s’asitia la capital d’España) adelgazare lo público y desaniciare impuestos a los que más tienen, al empar que da ayudes a los que menos les necesiten, considera la midida retrógrada, enquivocada, vergoñosa, un despropósitu dafechu. ¿Nun-y paez que ye un atracu muncho grande financiar con fondos públicos los negocios privaos y les persones más privilexaes? Pero claro, usté entiende que son frutu de les negociaciones cola ultraderecha pa sacar alantre los presupuestos autonómicos. Hai que decatase de qu’esa ultraderecha hasta va dos díes taba dientro del PP. ¿Sedrá qu’esa ideoloxía d’ultraderecha forma parte principal del ADN del so partíu y darréu d’ello nun ye quien a modernizase y equiparase a los partíos conservadores europeos? Señor Feijóo, llegó’l momentu d’amosar el so talante moderáu del que tanto presume y acabar con esta midida que, tal como diz la ministra d’Educación, Pilar Alegría, en Madrid (na capital d’España), faise un Robin Hood al revés: el PP quítalo a les clases medies pa dá-ylo a les clases altes. Ye a dicise, socialicen a los ricos y caltienen les midíes lliberales que tanto-yos gusten coles perres del restu de madrilanos, incluyida la verdadera clase media.
Les coses asina, nun choca que la directora d’Incidencia Social y Política de Save the Children, Catalina Perazzo, diga que si unu de cada tres neños ta en riesgu de probeza n’España, col sufrimientu que se provoca nes families debío al aumentu del costu de la vida, les beques tienen que facilitar más que nunca que puean estudiar los que más difícil lo tienen; esto ye, que se concedan les ayudes por razones socioeconómiques.Ye sabío que «nacer nuna familia con baxos recursos supón cuatro vegaes más probabilidaes de repitir cursu y cinco vegaes más riesgu d’abandonu tempranu que cuando naces nuna familia con posibles».
¿Cómo’l presidente del segundu partíu d’España permite premiar a los más privilexaos? ¿Cómo pue sofitar una midida tan inxusta y contraria al principiu d’igualdá d’un estáu social y democráticu de Derechu? Dende llueu que nun ye por desconocimientu: tol mundu sabe que les beques y ayudes con dineru público pa la educación cumplen la finalidá de permitir qu’aquelles families que nun disponen de los recursos económicos suficientes tengan la oportunidá de que los sos fíos sigan estudiando, más entá col 28% de la población española en riesgu de probeza o esclusión social por causa la crisis.
Hasta agora, señor Feijóo, el PP aceptaba que les beques teníen que convertise nuna más de les midíes redistributives de les rentes y la riqueza, un principiu d’acción en favor de la igualdá que ta conectáu cola concepción d’España como un Estáu Social recoyida nel artículu 1.1 de la nuesa Constitución. ¿Cómo pue ser posible que’l señor Feijóo, un políticu que-y presta presentase como un home moderáu, namás llegar a la presidencia del PP permita que la comunidá de Madrid seya contraria al principiu elemental de la equidá? Ello ye que’l «discutiniu nun ye razonable» cuando’l so partíu se pon en contra de lo que significa una sociedá democrática y avanzada no social, recoyida nel artículu 31.2 de la Constitución onde se diz que “el gastu públicu fadrá una asignación equitativa de los recursos públicos ...”.
Señor Feijóo, si daquién esperaba que camudare la política educativa del so partíu, que reconociere los efectos nocivos de la LOMCE, una llei ensin consensu nengún, segregadora, retrógada y que supunxo munchos recortes, al tiempu que diere sofitu a la nueva llei educativa, la LOMLOE, que caltién una visión moderna, xusta, flexible ya inclusiva qu’apuesta pola excelencia ya equidá, yá sabe que nada va camudar nin na cuestión educativa, nin en nengún otru aspeutu tal como vimos na respuesta del so partíu nel Debate del Estáu de la nación d’esta selmana.
¿Cómo pue tar en contra, señor Feijóo de la partida de beques actuales, que sube a 2.134 millones d’euros y col suplementu adicional de 100 euros mensuales que van concedese pa los estudiantes de setiembre a avientu con mires de garantizar que naide tenga que dexar los sos estudios por razones económiques? Tendría qu’escuchar mui sollerte al presidente d’España cuando diz que «les beques son un ascensor social y non un mecanismu pa perpetuar desigualdaes».
Potenciar o nun potenciar una educación equitativa, that is the question, o meyor potenciar una educación equitativa habría ser la respuesta clara del señor Feijóo. De toles formes, visto lo visto, la única visión del Partíu Popular na educación pasa per opciones elitistes, accesibles namái a quien la puean pagar.