El Benidorm Fest acepta canciones n'asturianu, anque siempre que nun supere'l 40% del total de la lletra
AGORA
Nel Benidorm Fest 2023 van poder participar cantares en castellanu, gallegu, vascu o catalán. Amás, va aceptase la participación de cantares en llingües españoles que nun son oficiales, como l'asturianu o l'aragonés, pero siempre que la parte nesi idioma nun supere'l 40% del total de la lletra.
Na primer edición del festival onde s'escueye'l representante de TVE n'Eurovisión, la banda de folk gallegu Tanxugueiras foron les favorites del públicu pa representar a España na edición de 2022. El cantar que llevaron al festival foi «Terra», un tema en gallegu qu'inclúi tamién frases en catalán, vascu y asturianu. Con too, quedaron nun tercer puestu énte la puntuación baxa del xuráu profesional de TVE.
Na edición pasada, les bases del Benidorm Fest aceptaben cantares en castellanu o nes llingües cooficiales d'España -gallegu, vascu y catalán-. Amás, aceptábense fragmentos n'idiomes estranxeros, siempre que nun superaren el 35% del total. Anguaño, les bases establecen que la lletra tien que tar en castellanu o nes llingües cooficiales, anque tamién s'acepten cantares con fragmentos «en llingües non oficiales d'España y idiomes estranxeros, siempre que nun superen el 40% del total de la lletra del cantar».
Quier dicise, yá se recueye la existencia d'idiomes como l'asturianu o l'aragonés. Sicasí, si un grupu quier participar con un cantar n'asturianu, la lletra nesti idioma nun podría superar el 40% del total y tendríen que cantar el restu del tema nuna llingua oficial d'España, informa Europa Press.