Los paseos van cuntar con una guía turística que va ufiertar información a lo llargo del percorríu
26 jul 2022 . Actualizado a las 11:34 h.A partir d'esti vienres, y hasta'l 29 d'agostu, la Mancomunidá Comarca d'Avilés va ufiertar paseos guiaos en barcu pela ría como esperiencia pilotu pa evaluar la so acoyida y con vocación de continuidá. Una actividá turística nueva que pon en valir la Ría d'Avilés y ta plantegada con mires de facela cada vez más relevante nel día a día de la ciudá.
Los viaxes van tener llugar de miércoles a domingu y aquellos llunes y martes que seyan festivos nel periodu de duración del serviciu, lo que fai un total de 29 díes. Los barcos van partir dende'l pantalán númberu 10 del puertu deportivu d'Avilés, el trayectu va tener una duración d'una hora y va percorrer el tramu del paséu de la Ría hasta'l faru d'Avilés, dir y volver, siempre que les condiciones marítimes lo permitan. Si nun fuera asina, el regresu va realizase alredor de la Peña del Caballu.
Van ufiertase cuatro pases al día con una capacidá máxima de 10 persones a bordu, colo que más d'un millar de persones van poder esfrutar d'esta propuesta lúdica nueva. Los horarios de los pasaxes van ser a les 11:00, 12:30, 17:00 y 18:30 hores, a los que podría sumase otra franxa horaria.
A bordu va viaxar tamién una guía turística que va acompañar la visita con información sobre'l contestu históricu de la Ría d'Avilés, la so importancia dientro del Arcu Atlánticu y la so rellación cola industria, el Centru Niemeyer y otros recursos como'l Cañón d'Avilés y l'Observatoriu d'Aves de Zeluán.
El costu del viaxe va ser de 5 euros per persona previa reserva al traviés del corréu infoasturiasnavega.es o'l teléfonu 663 810 809. En faciendo la reserva, habrá de dir a la caseta informativa instalada nel paséu de la Ría, apurrir los datos personales y abonar l'importe de la entrada pa recibir el tiquet col día y hora acutaos.
Dende'l llunes 25 de xunetu, va instalase una caseta informativa nel paséu de la Ría. Primeramente va tar abierta al públicu una "jaima" onde quien lo precise va poder resolver les sos duldes y consiguir les sos entraes.