Barbón va acompañar a la representación asturiana, formada por 25 bandes y artistes
05 ago 2022 . Actualizado a las 18:26 h.Asturies llega como convidada d'honor a la 51er edición del Festival Intercélticu de Lorient con una amplia programación que va amosar el talentu de 25 bandes y artistes a lo llargo de diez díes. El presidente asturianu, Adrián Barbón, va visitar el próximu martes, 9 d'agostu, el certame bretón, ún de los referentes europeos de la cultura celta, que cada añu axunta a cerca de 800.000 asistentes.
La Conseyería de Cultura, Política Llingüística y Turismu diseñó un ambiciosu programa pa esta edición. El pabellón de la comunidá, pel que van pasar ocho artistes y bandes musicales, va acoyer tamién alcuentros lliterarios con autores nuevos en llingua asturiana, un rincón dedicáu a la cultura sidrera y un puntu d'información turística.
La conseyera de Cultura, Berta Piñán, va participar esti sábadu na xornada inaugural del festival, cuando se va abrir al públicu'l pabellón del Principáu y tamién l'amuesa Llabor, na que l'artista llavianés Ricardo Villoria combina distintos formatos pa reconstruyir con una mirada vanguardista y tresgresora la so visión de la cultura tradicional asturiana. La esposición inclúi 50 fotografíes d'entornos rurales ya industriales y semeyes de personaxes que componen l'universu personal del creador. Tamién incorpora la particular reinterpretación de Villoria sobre la indumentaria tradicional del folclor asturianu y dos pieces audiovisuales que se centren na tonada y na matanza del gochu, costume bien enraigonada na zona rural.
Homenaxe a Elías García
La figura del desapaecíu músicu Elías García va tener un protagonismu especial nesta edición del festival, onde se-y va tributar un homenaxe. Asina, el conciertu inaugural, que va correr mañana al cargu de Mapi Quintana, va recordar nel escenariu Le Théâtre al músicu asturianu fináu en 2019. Música pa tornar páxaros va ufiertar un repertoriu compuestu pa la ocasión xunto con cantares tradicionales del conceyu de L.lena. Esta fusión supón una reinterpretación de la música tradicional con influyencies de los soníos impresionistes y el jazz.
El cartelu oficial tamién va recordar a Elías García na Gran Nueche d'Asturies, el xueves 11 d'agostu, cuando Llan de Cubel y Hevia van xubir al escenariu L’Amphi-Espace Jean Pierre Pichard. Llan de Cubel, banda pionera del folclor asturianu a la que perteneció García y que revolucionó'l panorama de la música folk asturiana nos años 80, vuelve pa Lorient pa homenaxar a ún de los sos componentes históricos.
Lliteratura n'asturianu
Les voces más nueves de la lliteratura en llingua asturiana van cuntar con un espaciu nel pabellón d'Asturies, onde se van celebrar charres, llectures y meses redondes pa dexar constancia del bon momentu que vive la producción nesta llingua. Los díes 11, 12 y 13 van celebrase diversos alcuentros con Pablo X. Suárez, Solinca Turbón, María García Díaz y Xaime Martínez.
La programación de conciertos del pabellón autonómicu inclúi actuaciones de Llevólu’l Sumiciu, Eva Texedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella, Monteavaro, Muñalén & Rodrigues y Urso Dakoff.
Amás, nel programa oficial figura un ampliu plantel d'artistes d'Asturies, como Rodrigo Cueves, José Manuel Tejedor, Silvia Quesada, Proyectu Breizh Asturies, Cerezal, L-R, Muga, Javier Menéndez, Fabián Fernández, la Banda Gaites Llacín y el Grupu de baille Trebeyu. Pela so parte, Fernando Vázquez, Jaime Álvarez, Daniel Meré y Diego Lobo van ser los gaiteros participantes nel prestixosu Troféu MacCrimmon.