El Conceyu de Samartín del Rei Aurelio empieza'l procesu de llicitación de la obra
12 ago 2022 . Actualizado a las 05:00 h.El Conceyu de Samartín del Rei Aurelio empezó'l procesu de llicitación pa la igua d'un Área de Servicios d'Autocaravanes con capacidá pa 10 vehículos nes proximidaes del Muséu de la Minería y la Industria (MUMI), en L’Entregu. El proyectu, presupuestáu en 7.000 euros, finánciase con cargu al remanente municipal de tesorería y tien un plazu d'execución d'un mes.
«Con cuenta de potenciar el turismu nel conceyu y atrayer visitantes, vamos habilitar un área p'autocaravanes, un sector en puxanza nel nuestru país, nun allugamientu que consideramos afayadizu pola so proximidá al Muséu de la Minería y al circuitu de ciclocros», esplicó l'alcalde de Samartín del Rei Aurelio, José Ángel Álvarez «Quirós». Amás, «trátase d'un entornu tranquilu, separtáu del ruíu del cascu urbanu, con accesu a la sienda del paséu fluvial del Nalón», destacó.
L'área va contar con una plataforma de carga y descarga con rexa pal depósitu de les agües fecales, que va disponer d'un sumidoriu conectáu a la rede d'alcantarelláu pal vaciáu del depósitu del inodoru, xunto con un grifu pa la so llimpieza. Va disponer tamién d'un segundu grifu pal suministru d'agua potable.
La construcción d'esta área d'autocaravanes va llevase a cabu amortizando dalgunes de les actuales places del estacionamientu pa turismos allugáu pela redolada del MUMI y un parterre, pero ensin afectar a la ufierta global d'aparcamientu de la zona, que va siguir siendo igualmente abonda.
L'área de autocaravanes nueva va ser la segunda del conceyu, que yá cuenta con una nel aparcamientu del Pozu Entrego, con capacidá pa trés vehículos, que lleva funcionando dende l'añu 2010.