La feria d'ociu alternativu va poner el ramu al branu xixonés
16 ago 2022 . Actualizado a las 21:09 h.La CometCon, la gran cita d'ociu alternativu del norte d'España, echa a andar en pocu más de 15 díes en Xixón. Esta décima edición del eventu, que se celebra del 2 al 4 de setiembre, va axuntar a más de 20.000 asistentes nel recintu ferial Luis Adaro, nel que se van amosar les últimes novedaes rellacionaes col mundu de los videoxuegos, el manga, l'artesanía o'l cosplay.
Según la organización de la feria, van superase cifres prepandemia y espérase xenerar un altu impactu económicu y social na ciudá y na comunidá. Nesti sentíu, la demanda d'espaciu supera la ufierta: más de 40 espositores y 120 puestos artesanales veníos de toa España y Llatinoamérica daránse cita nesta edición nueva de la CometCon, que va xenerar unes 400 pernoctaciones ente espositores y organizadores ensin cuntar les de los asistentes veníos de fuera d'Asturies.
«Estos númberos son un bon indicativu del impactu económicu que l'eventu va xenerar na ciudá. Ensin dulda, CometCon ye un eventu que va ayudar a impulsar la demanda d'hostelería y ociu de Xixón gracies a un gastu mediu diariu per asistente d'unos 50 euros», espliquen dende la organización de la Cometcon, onde tamién recuerden qu'otru de los grandes reclamos del festival ye la so fiesta nocherniega previa, la CometCon Party, que se va celebrar na nueche del 2 de setiembre.
Les entraes yá tán disponibles en cometcon.org y va contar colos «meyores» openings d'anime, K-Pop, Eurobeat y Anisong. Ente les decenes d'invitaos nacionales ya internacionales de la feria destaquen los youtubers Isaac Loulogio Sánchez, El Cubil de Peter o Pazos64; los actores Jordi Cruz, Carlos Ysbert o Ana de Castro y los cosplayers TalyBb, Askal o Anhyra que, ente otros, van esfrutar tamién el sábadu 3 de setiembre d'una cena de xermandía entamada pola CometCon.