Iniciativa pol Asturianu, en collaboración cola Cámara de Comerciu, entama esta xornada de reivindicación del idioma
18 ago 2022 . Actualizado a las 11:46 h.La Feria de Muestres d’Asturies celebra esti sábado’l primer Día de la Llingua Asturiana, una xornada que va incluyir un bayurosu programa d’actividaes dientro del recintu ferial. Iniciativa pol Asturianu, en collaboración cola Cámara de Comerciu, entama esta xornada de reivindicación del idioma, que va aniciase a les once y media de la mañana con una visita institucional.
Amás de percorrer dellos puestos que faen usu del asturianu, la ruta va incluyir un homenaxe a les figures de Gaspar Melchor de Xovellanos y Ramón Menéndez Pidal, que cuenten con un bustu dientro del recintu ferial. A meudía, en collaboración con La Buelga, ta prevista una amuesa de xuegos tradicionales asturianos nel tendayu del Muséu del Pueblu d’Asturies, que va ufiertar a les cinco de la tarde una visita guiada n’asturianu a los sos espacios.
Darréu, a les cinco y media nel espaciu d’Iniciativa pol Asturianu va facese un repartu de materiales de la Oficina de Normalización Llingüística de Xixón. También l’Asociación d’Escritores d’Asturies va a collaborar nesti I Día de la Llingua Asturiana cola organización d’un recital poéticu que se va celebrar na Sala Mirador a les 18.30 hores. Media hora más tarde, a les 19 hores, va representase la obra de títeres el Capiellín Colloráu nel pabellón del Conceyu de Llangréu.
A les siete y media de la tarde, nel puestu de Ver Asturies, va entamase l’alderique Etnografía y Llingua Asturiana: un repás a la tradición cultural. La xornada va rematar con una tastia de sidra natural nel puestu del Conceyu de Mieres de magar les ocho de la tarde. A la mesma hora, nel espaciu d’Iniciativa pol Asturianu va facese entrega de los premios del primer concursu lliterariu Ensin muyeres nun hai idiomes entamáu pola organización con motivu de la celebración del 8 de marzu.