Pixán estrena «El nacimientu d'un reinu» pa conmemorar los 1.300 años de la batalla de Cuadonga
AGORA
El recital, qu'axunta testos inéditos de nueve poetes nun viaxe lliterariu y musical, celébrase'l domingu na basílica
18 ago 2022 . Actualizado a las 23:34 h.El tenor asturianu Joaquín Pixán va ufiertar el domingu'l conciertu El nacimientu d'un reinu na basílica de Cuadonga, un espectáculu creáu nel marcu de los actos impulsaos pol Gobiernu d'Asturies pa conmemorar los 1.300 años de la batalla de Cuadonga. El conciertu va empezar a les 19 hores y l'accesu va ser gratuitu, previa retirada de la invitación nesti enllaz.
El recital propón un viaxe musical y lliterariu dende Lleón hasta Cuadonga nel que Pixán convierte testos de nueve escritores y poetes en cantares y una cantata. Asina, el repertoriu inclúi pieces de Pedro de Silva (En Covadonga el milagro), Pablo García Baena (Aula regia), Luis del Val (Loa a Covadonga), Fernando Álvarez (Agua de la fuente clara), Ángel Fierro (Almuzara, nieve del alto frío, ¿por qué va a ser que en la alta noche?), Alfonso Sánchez Lorenzo (La noche azul), Javier Almuzara (Rosa Narcea), Aurelio González Ovies (Oro del norte) y Xuan Xoxé Sánchez Vicente (El nacimientu del reinu).
Los xéneros de la tradición popular asturiana inspiren la mayoría de los temes iguaos por Pixán en collaboración col músicu Manuel Pacheco. La escepción a esi filu conductor del folclor tradicional ye la cantata que da títulu al espectáculu y que'l so llinguaxe musical encaxa nel formatu de narración por etapes que propón el conciertu. Al pie de Joaquín Pixán, van xubir al escenariu Manuel Pacheco (pianu), Martín Pérez (flauta), Nel Pérez (clarinete) y Javier Romero (cello). Xuan Xosé Sánchez Vicente y Fernando Entrialgo van actuar como narradores pa guiar al públicu peles distintes etapes.