La vistimienta y los oxetos d'adornu paleolíticos atopaos en Ribeseya, nel Centru d'Arte Rupestre de Tito Bustillo
AGORA
El centru entama un programa d'actividaes paraleles rellacionaes col conteníu de l'amuesa
20 ago 2022 . Actualizado a las 05:00 h.La vistimienta y los adornos y colgantes qu'utilizaron los grupos de cazadores pañadores que poblaron Ribeseya nel Paleolíticu Cimeru centren el nuevu bloque espositivu de l'amuesa «De la escuridá a la lluz. La cultura material de les cueves de Ribeseya nos fondos del Muséu Arqueolóxicu d'Asturies» nel Centru d'Arte Rupestre de Tito Bustillo.
El trabayu de la piel y l'utillaxe básicu pa la vistimienta paleolítica o los más de 200 oxetos d'adornu documentaos nes cueves de Ribeseya, un 89% en Tito Bustillo con pieces destacaes como'l conxuntu de colgantes en güesu hiodes, son dalgunos de los aspectos que s'enceten nesti tercer bloque temáticu de l'amuesa.
Amás de paneles informativos, el públicu puede ver hasta'l 16 d'ochobre oxetos d'adornos y colgantes procedentes de la Cueva de Tito Bustillo, como los fabricaos con conches de moluscos o con dientes y güesos hioides d'animales. Tamién podrán reparase distintes ferramientes emplegaes pa la confección de la vistimienta, tamién atopaes en Tito Bustillo, como punzones, espátules y aguyes.
El Centru Tito Bustillo entama un programa d'actividaes paraleles rellacionaes col conteníu de l'amuesa. Pal públicu familiar van realizase dos talleres: Prehisto-maestros de la cordura, p'aprender a remanar l'aguya al estilu de los nuestros antepasaos y conocer el trabayu que realizaben coles pieles pa fabricar ropa y pieces testiles, los sábados y domingos del 20 d'agostu al 18 de setiembre; y Adornos ancestrales, pa realizar un collar con abalorios similares a les qu'utilizaben los grupos de cazadores pañadores paleolíticos, les fines de selmana del 24 de setiembre al 16 d'ochobre.
Amás Esteban Álvarez, profesor de la Universidá de Salamanca y ún de los directores del proyectu d'investigación centráu na zona de l'antigua entrada de la Cueva de Tito Bustillo, va ufiertar una conferencia sobre l'arte mobiliar, vistimienta y adornos na Prehistoria na contorna del Seya'l 10 de setiembre. Tamién va haber visites guiaes a l'amuesa temporal el 27 d'agostu y 24 de setiembre de la mano de Miguel Polledo y Santiago Calleja, na que van esplicar los detalles más relevantes d'esti bloque espositivu, y un taller d'arqueoloxía esperimental con Aurelio Munúa'l 10 d'ochobre.
El Centru d'Arte Rupestre ufierta amás el taller Arte en familia nel que conocer les técniques y materiales colos que pintaron cueves como la de Tito Bustillo los miércoles, xueves y vienres d'esti mes y el taller infantil Pequeños artistes de la Prehistoria tolos díes d'apertura n'agostu y les fines de selmana de setiembre.