Viaxe al pasáu na selmana medieval de Castrillón

F. S.

AGORA

El castiellu de Gauzón va ser el protagonista d'un programa con talleres, conferencies y actividaes pa los más pequeños

24 ago 2022 . Actualizado a las 05:00 h.

Castrillón va volver a la Edá Media ente los díes 20 d'agostu y 4 de setiembre, la VII Selmana Medieval del conceyu va contar con un ampliu programa nel que s'inclúin conferencies, recreaciones históriques y talleres infantiles y que van tener dos escenarios de luxu: el Monesteriu de la Mercé y el Castiellu de Gauzón.

Precisamente la fortaleza, ún de los principales castiellos de la Edá Media asturiana y nel que se forxó ún de los sos principales símbolos va ser el protagonista de la edición d'anguaño que lleva por títulu: “Gauzón y l'arqueoloxía del Reinu d'Asturies”. Ente les actividaes presentaes inclúyense visites guiaes al xacimientu del castiellu, pero tamién programación destinaes a los neños con trés talleres sobre la historia de la Cruz de la Victoria, la heráldica y les fortaleces medievales asturianes.

El Día Grande d'esta selmana marca'l 2 de setiembre nel calendariu: nesi xornada llevantará'l campamentu qu'entama'l grupu de recreación histórica de la Cla del Cuervu, nel que podrá vese indumentaria armamentu y otros oxetos propios de la vida cotidiana de la dómina.

Amás, el ciclu de conferencies col que se completa'l programa va contar cola participación de Lorenzo Arias Páramo, profesor d'Historia del Arte de la Universidá d'Uviéu, que va impartir la charra inaugural col títulu 'La Cruz de la Victoria. La orfebrería del Reinu d'Asturies', el 2 de setiembre, a les 19:00 hores.