La entrada ye de baldre y celébrase ente'l 29 y el 31 d'agostu na Escuela de Comerciu
26 ago 2022 . Actualizado a las 05:00 h.La Muestra de Cine Documental Musical de Xixón, entamáu pol colectivu cultural Cine Club Asturias, va celebrase ente'l 29 y el 31 d'agostu cola proyección de dellos curtiumetraxes y llargumetraxes na Escuela de Comerciu de Xixón. La entrada, en toles proyecciones, va ser gratuita hasta completar l'aforu.
Según espliquen los organizadores, que contaron cola collaboración del Festival de Cine de Xixón y el Festival CortoGijón, La Muestra «naz nuna ciudá en constante ebullición cultural onde la cultura cinematográfica y musical siempres tuvo presente con festivales referentes na materia», polo que «cobra sentíu l'apaición d'un festival centráu nel espardimientu de películes de non ficción qu'enceta l'ampliu mundu de la música nos sos distintos aspectos temáticos y formales».
L'oxetivu principal d'esti festival nuevu, que'l so programador ye Sergio Valbuena, ye «la unión de la música y el cine con una programación ecléctica y eminentemente pedagóxica pa tomar la música dende dellos focos y puntos de vista». Los organizadores tamién sorrayen el potencial aumentu de les pieces audiovisuales que reflexen la situación de la música y que, na escena nacional, «solo atopamos dos referentes similares, l'In Edit de Barcelona y el Dock of The Bay en San Sebastián, lo que xunto a La Muestra un conceptu d'orixinalidá tovía por esplorar nel territoriu asturianu».
El programa previstu entama esti llunes, 29 d'agostu, cola proyección, a les 19.30 hores, del documental Paco Loco: viva el noise (Daniel Cervantes, 2020). El martes, a les 18.30 hores, celébrase una amuesa de curtiumetraxes colos títulos Un parell de canços després (Jaume Carrió, 2022) y Los residentes, un junte de rap (Martin Biaggini, 2021). De siguío, a les 19.30 hores, proyéctase Dois tiempos (Pablo Francischelli, 2021), que s'estrena n'España. El miércoles, a partir de les 18 hores, van poder vese los documentales A través de un teclado (Álvaro Menéndez Grand, 2022) y Lluz d'agostu en Xixón (Alejandro Nafría, 2017).