El festival de música va contar coles actuaciones de Felpeyu, Llan de Cubel y Dixebra
26 ago 2022 . Actualizado a las 20:52 h.El Conceyu d'Ayer recupera'l próximu 10 de setiembre la Nueche Celta, que se va celebrar en Soto y con un cartelu encabezáu por Felpeyu, Llan de Cubel y Dixebra. Según informen dende'l conceyu, decidióse retomar esti festival de música celta pa promover la música tradicional y coles mesmes crear un eventu que permita dinamizar l'actividá cultural del conceyu.
La cita va empezar a les 23 hores cola actuación de la banda de gaites El Gumial, que va dar pasu al conciertu de Felpeyu, que va tener llugar a les 0.30 hores. Llan de Cubel va empezar la so actuación a les 2.00 hores y, a les 3.30 hores, Dixebra. La nueche va terminar alredor de les 6.00 hores y, pa facilitar el tresporte a los asistentes, el Conceyu entamó autobuses búho, con dos llinies que van partir de Soto con destín Mieres y Felechosa, con salíes a les 3.00 hores y a les 6.00 hores.
La xornada festiva va empezar de toles maneres a les 17.30 hores cola primer edición del Concursu de bandes de gaites Valles d'Ayer, cola participación de, a lo menos, 10 bandes con 200 integrantes. Les bases del certame establecen dos categoríes o graos y la elección de participación va ser al cargu de cada agrupación.
Les bandes de gaites interesaes en participar van poder inscribise na competición hasta'l día 5 de setiembre. Tola información sobre'l concursu y sobre'l procedimientu pa formalizar la inscripción atópase disponible na páxina web www.vallesdealler.com. La formación mínima precisa pa participar va ser d'ocho gaites, dos tambores y un bombu, que tendrán d'emplegar cualquier gaita de la península ibérica en cualquier tonalidá disponible. El concursu ta dotáu con trés premios en caúna de les categoríes, compuestos por troféu más un vale económicu pa trocar por material, sumando la bolsa total de premios un total de 5.250 euros.
Tres la finalización del concursu, a les 20 hores, van llevase a cabu les actuaciones de los grupos de baille locales Les Ayalgues d’Ayeri y Folclor Ayerán. De siguío, alredor de les 21.30 hores, va dase a conocer el fallu del xuráu mientres l'actu d'entrega de premios.