Renovadores de les bandines tradicionales, xueguen col repertoriu tradicional asturianu ensin dar de llau a músiques d'otros países o composiciones propies
28 ago 2022 . Actualizado a las 05:00 h.La Garrapiella ye una formación d'Uviéu qu'entamó'l so camín en 2013 a la manera de les clásiques bandines tradicionales de gaites y percusión que, en tiempos pasaos, caleyaron toa Asturies recorriendo y animando munches fiestes y romeríes populares.
L’añu 2017 deciden renovar la so propuesta musical y estética p’afondar en soníos a los que les bandines n’activo nun nos teníen avezaos. Por eso incorporen a la formación instrumentos como la cordión de botonera, el saxofón barítono y les gaites de distintes tonalidaes. Musicalmente xueguen col repertoriu tradicional asturianu ensin dar de llau a músiques d’otros países o composiciones propies, buscando asina un soníu y un carácter únicos. Amás tán influenciaos por grupos del mesmu estilu como Tribal Jâze (Bretaña) o Too Many Zooz (Estaos Uníos).
La propuesta innovadora de la bandina fexo que tuviere presente en dellos de los principales eventos festivos espardíos per tola xeografia asturiana, ente los que destaquen la Muestra de Música y Danza Popular de Lluanco (2018 y 2022), la XXXV Noite Celta de Porcia (2018), el Festival Sol Celta d'Avilés (2019), la Nueche Folk de Fitoria (2019), la XVIII Fiesta de la Vendimia de Cangas del Narcea (2019), el Festival Al Resve de Cimavilla, Xixón (2021), el III Alcuentru de Bandes de Gaites de Llanera (Llugo, 2022) o'l Festival Interceltique de Lorient (2022), nel añu d'Asturies, en representación de la música «de caleyeo» que se fai n'Asturies.
Tres tou esti recorríu La Garrapiella decide sacar el so primer trabayu Esmesando, onde fai un repasu al so repertoriu habitual cola intención d'ofrecer una muestra de la so producción actual, acullá de los sos directos enérxicos. Los sos próximos conciertos, en septiembre van ser nel Festival Internacional de la Gaita (Villaviciosa), la Nueche Folk de Carrio (Llaviana), les Fiestes de La Ponte (Pravia) y l'Homenaxe a Elías García (Villaviciosa).