El conceyu retoma'l so certame de sidra casero depués de trés años de parón
29 ago 2022 . Actualizado a las 05:00 h.Piloña va volver a celebrar el primer domingu de setiembre, depués de trés años de parón, el so certame de la sidra casero. Ribeseya ye'l conceyu convidáu d'esta sesta edición, na que va haber novedaes como una parrillada y un concursu d'escanciáu popular. La gran folixa sidrera de Piloña va tener llugar el domingu 4 de setiembre na plaza del Ganáu de L'Infiestu.
Va empezar a les 11 hores con un pasucais animáu con un carru de vaques, música tradicional, repartu de sidra y la participación d'una delegación de Ribeseya. La cantante Mina Longo va inaugurar la fiesta cola llectura del pregón y, de siguío, va disputase la final del VI Concursu de Sidra Casero de Piloña ente les 12 meyores sidres escoyíes el sábadu.
«Tamos bien satisfechos porque anguaño inscribiéronse bastantes llagareros nuevos y eso ye bien positivo, yá que significa que se caltien la tradición, que'l llabor de l'asociación ta dando los sos frutos y qu'esta fiesta motiva a los ellaboradores», destaca Luis Sariego, presidente de l'Asociación de Sidra Casero de Piloña, colectivu qu'entama'l certame. «Ye'l día d'alcuentru de los llagareros y d'axuntase na capital del conceyu ente culetes de sidra», repostia.
Mientres se disputa la final, los asistentes van poder prebar les bébores participantes, que se van ufiertar nos distintos puestos allugaos na plaza del Ganáu. Namás ye preciso mercar el vasu conmemorativu del certame al preciu de cuatro euros. El públicu tamién va dar el so veredictu sobre les sidres participantes escoyendo col so votu popular la meyor. Una de les novedaes d'anguaño ye la parrilla de costielles, pitu, chorizu criollu y arroz con lleche que va poder tastiase por 20 euros.
Los llagareros caseros del conceyu de Piloña que deseen competir nel VI Concursu de Sidra Casero tienen de plazu hasta'l llunes p'apurrir les dos caxes con botelles de sidra tradicional asturiana que se requieren pal certame y pa la preba. Cada caxa tendrá de tar identificada col nome, el teléfonu de contactu y la llocalidá. Puede participase con dellos palos de bébora. Les entregues van realizase nel Llagar de Mestes.
El VI Concursu de Sidra Casero de Piloña tien como oxetivu celebrar un día d'alcuentru festivu ente los llagareros y potenciar la cultura sidrera nel conceyu, amás de destacar el llabor que desenvuelven nel caltenimientu d'esta tradición. La intención ye que toles parroquies del conceyu tean representaes, polo qu'animen a participar a toos aquellos qu'ellaboren bebida en casa. El presidente d'esti colectivu, Luis Sariego, destaca que «Piloña ye ún de los conceyos productores de mazana más importantes d'Asturies, con una calidá del frutu escepcional por cuenta de la so orografía y el so terrén, ente otres coses, y eso refléxase na cantidá de llagares caseros qu'hai».