L'Hospital Universitariu San Agustín d'Avilés va contar con una segunda resonancia magnética
AGORA
L'adquisición d'estos equipamientos financiase colos fondos europeos Next Generation
04 sep 2022 . Actualizado a las 05:00 h.El Principáu aprobó un gastu de 1,1 millones pa l'adquisición d'una resonancia magnética destinada al Hospital Universitariu San Agustín (HUSA), con cabecera n'Avilés. Esti dispositivu súmase al yá esistente nesti centru y la so incorporación enmárcase nel Plan d'Inversión n'Alta Tecnoloxía (Inveat).
Con esta nueva resonancia, remata l'autorización del gastu de los 17 equipos pa siete centros sanitarios previstos p'Asturies col que s'anueven o amplíen dispositivos d'alta tecnoloxía p'ameyorar el diagnósticu tempranu d'enfermedaes oncolóxiques, cardiovasculares, neurodexeneratives y cróniques. Amás del HUSA, los centros sanitarios de la rede pública que se van beneficiar d'esta inversión son:
-L'Hospital Universitariu Central d'Asturies (HUCA) con 6 equipos: anovación d'una resonancia magnética y d'un tomógrafu axal computarizáu (TAC), les ampliaciones d'una de tomografía per emisión de positrones (PET/TAC), un TAC, un equipu de cardioloxía intervencionista (sala hemodinámica) y un dispositivu neurovascular intervencionista nuevu.
-Dos aparatos nuevos pal Hospital Monte Naranco (área sanitaria IV): l'ampliación d'un tomógrafu computarizáu (TAC) y ún de resonancia magnética.
-Cuatro dispositivos pal Hospital Universitariu de Cabueñes: les ampliaciones d'un equipu de radioloxía vascular intervencionista, de cardioloxía intervencionista (sala d'hemodinámica), ún de tomografía axal computarizada (TAC) y la renovación d'una resonancia magnética.
-Dos dispositivos pal Centru de Salú Puerta la Villa, (área sanitaria V): l'ampliación d'una resonancia magnética y un aparatu de tomografía axal computarizada.
-La renovación de 1 TAC pal Hospital de Xarrio (área sanitaria I).
-L'ampliación de 1 TAC nel Hospital Carmen y Severo Ochoa (área sanitaria II)
L'adquisición d'estos equipamientos finánciase colos fondos europeos Next Generation UE del Plan Inveat del Gobiernu d'España y supón la mayor inversión n'alta tecnoloxía. Nel casu d'Asturies cuenta con una partida que xube 15,6 millones, de los que 12,9 vienen d'Europa y otros 2,7 apórtalos el Principáu.