Un volume recueye los discursos de los mandatarios asturianos na conmemoración del Estatutu d'Autonomía
07 sep 2022 . Actualizado a las 08:27 h.Dende'l gobiernu preautonómicu nos empiezos de la transición democrática hasta'l presente, el Gobiernu d'Asturies recoyó nun tomu los discursos oficiales de los presidentes del executivu autonómicu, una edición que se va llanzar por cuenta de la conmemoración del 40 aniversariu del Estatutu d'Autonomía.
Col títulu de Palabra de presidente. Los proyectos políticos que construyeron la Asturias contemporánea: discursos de investidura 1982-2019, el tomu percuerre los mandatos que van dende los años 80 hasta la llexislatura de Barbón. Asina, el volume recueye les intervenciones acordies col orde cronolóxicu de los mandatos: Rafael Fernández, Pedro de Silva, Juan Luis Rodríguez-Vigil, Antonio Trevín, Sergio Marqués, Vicente Álvarez Areces, Francisco Álvarez-Cascos, Javier Fernández y Adrián Barbón. El llibru recueye les intervenciones nes que los socesivos presidentes afitaron les llinies maestres de los sos proyectos de gobiernu énte la Xunta Xeneral.
Esti proyectu pon el ramu a los actos conmemorativos del 40 aniversariu del Estatutu d'Autonomía, qu'empezaron va un añu cola entrega de la Medaya d'Oru d'Asturies a la Comisión de los 8, encargada d'ellaborar el primer borrador del futuru proyectu de llei. El llibru, disponible yá en formatu dixital, ta prologáu pol presidente del Senáu, Ander Gil, ya inclúi reproducciones de la galería de semeyes de tolos xefes del Executivu qu'alluga'l palaciu de la Presidencia.