Madrilanos, andaluces y asturianos fueron quien más s'averaron a Proaza, que superó les 5.000 visites
25 sep 2022 . Actualizado a las 05:00 h.¿Quién quier ver osos n'Asturies? ¿y cuántos son? Delles pistes sobre estos númberos dioles la Casa del Osu de Proaza nel balance de los meses de branu y que revelaron que más de 5.000 persones s'averaron al llugar pa ver los animales y que, amás de los mesmos asturianos, los madrilanos y los andaluces son quien más interés amosaron.
La Casa del Osu de Proaza rexistró 5.313 visitantes ente'l 1 de xunetu y el 13 de setiembre frente a los 4.610 que recibió en 2019, antes de la pandemia de coronavirus.
Los Itinerarios de branu, la propuesta gratuita de la Fundación Oso de Asturies (FOA) pa que los visitantes conozan meyor la especie y avérense a visitar la corralada en percorriendo la Casa del Osu, algamaron los 602 participantes, una cifra similar a la del añu pasáu (599) pero mui superior a los datos rexistraos en 2019, con 247 persones apuntaes.
El porcentaxe de visitantes estranxeros sigue creciendo (11 por cientu del total), anque la mayoría de turistes (22 por cientu) veníen de Madrid, siguíu d'Andalucía (11%) y Asturies (10%).
Los informadores ambientales de la FOA, que cada branu asesoren a los visitantes sobre posibilidaes y pautes precises de comportamientu n'espacios naturales, llegaron a 6.500 persones esta temporada, 1.700 más que l'añu pasáu.
Estos axentes desenvolvieron el so llabor nos parques naturales d'Les Ubiñes-La Mesa, Somiedo y Fuentes del Narcea, Degaña y Ibias y nos valles oseros.
Les 2.700 encuestes realizaes a turistes permitieron saber que la mayoría veníen esfrutar de la naturaleza (60%) o por ociu (30%) frente a una minoría que facíen turismu deportivu (5%) o observación de fauna selvaxe (5%).
Estos últimos queríen ver, preferentemente, grandes mamíferos y nun entorno tranquilu y la mayoría declaró que yera la primer vegada qu'acolumbraba un osu (61%).
Nos sos percorríos los informadores moviéronse en coches 100% eléctricos, vencíos pol Grupu Baldajos, pa los que s'utilizaron los puntos de recarga de EDP.