Preséntase como una entidá abierta a la participación de socios y socies y entamará un premiu a la investigación n'asturianu y unes xornaes biañales
24 sep 2022 . Actualizado a las 13:32 h.L’asociación Grana, que se presenta güei en Xixón, ye la iniciativa d’un grupu promotor d’amigos y amigues de Yolanda Huergo, concejala de Podemos en Xixón que finó en 2020, que ta abierta a la incorporación de socios y socies. L’oxetivu d’esta iniciativa, espliquen, ye tresformar la señaldá que produz el recuerdu de Yolanda «l’amiga, la compañera, l’activista… n’enerxía creadora, na grana azul del futuru de la que fala’l cantar de Felpeyu que tanto-y gustaba a ella».
L’equipu promotor de Grana pretende crear con esta asociación un espaciu d’alcuentru pal debate y pal pensamientu y d’estímulu a iniciatives diverses, «pero siempre col focu puestu n’Asturies y cola perspectiva de la defensa de los derechos llingüísticos, los derechos humanos, la xusticia social y la protección del mediu ambiente, que foron los ámbitos nos que trabayó Yolanda, y calteniendo tamién l’espíritu constructivu y de diálogu que guiaron siempre la so trayectoria personal y política».
Con esi planteamientu, Grana entamará dos iniciatives biañales qu’anuncia na presentación, un premiu a la investigación n’asturianu, el premiu Yolanda Huergo, del que se va convocar la so primer edición en 2023 y unes xornaes monográfiques que van entamar esti mesmu añu 2022 nel mes de payares.
(Sobre)vivir n’Asturies. Presente y futuru del territoriu y la so población
Nes primeres xornaes monográfiques organizaes por Grana va tratase la forma y repartu de los recursos n’Asturies, la ordenación del territoriu y la evolución del repartu poblacional. La intención ye valorar, nun espaciu de debate y reflexón, cómo los planes y los debates actuales sobre los desarrollos urbanísticos, la evolución demográfica, el despoblamientu de les ales y los planes de desenvolvimientu económicu van condicionar el futuru d’Asturies.
Pa ello va contar cola presencia de seis espertos, tanto d’Asturies como d’otros llugares, en diverses disciplines que van aportar la so visión en dos sesiones que van tener llugar nel Antiguu Institutu Xovellanos de Xixón, la tarde del viernes 4 de payares y la mañana del sábadu 5.
El viernes 4 inaugúrense les Xornaes cola conferencia Un casino en plena selva. La ordenación del territoriu n’Asturies, impartida pol profesor del Departamentu de Xeografía de la Universidá d’Uviéu Ícaro Obeso.
El sábado 5 de payares pela mañana habrá dos eventos. El primeru d’ellos ye un actu nel que, col formatu que denominamos Conversaciones con…, l’arquitecta urbanista Laura López dirixirá un coloquiu con Sebastiá Jornet, arquitectu urbanista en Jornet Llop Pastor y profesor del Departamentu d’Urbanismu y Ordenación del Territoriu de la Escuela Técnica Superior d’Arquitectura de Barcelona, y que va llevar por títulu Territorio: asignaturas pendientes.
Darréu d’ello habrá una mesa redonda baxo’l titulu de Visiones d’Asturies na qu’intervendrán Manuel Maurín, profesor del Departamentu de Xeografía de la Universidá d’Uviéu; Mariana Borissova Boneva, arquitecta urbanista en Urbania 2003 y vocal de urbanismo del Colegio Oficial de Arquitectos de Asturias; Francisco José Llera Ramo, catedráticu de ciencia política de la UPV y director del Euskobarómetro, y Inaciu Llope, psiquiatra y miembru de la fundación Belenos.