«El Principáu tuvo al altor», afirma Piñán sobre Lorient énte les crítiques del PP pola «oportunidá perdida»
AGORA
Piñán reconoció la falta d'un restaurante asturianu ente la delegación rexonal en Lorient, pero esplicó qu'intentaron qu'hubiera esa presencia n'hasta trés ocasiones
29 sep 2022 . Actualizado a las 18:16 h.La conseyera de Cultura, Política Llingüística y Turismu, Berta Piñán, indicó esti xueves que l'Executivu «tuvo al altor» de qu'Asturies fora nesta edición la invitada d'honor del Festival Intercélticu de Lorient, el de más prestixu del mundu dedicáu a la música del Arcu Atlánticu.
Sicasí, el 'popular' Alvaro Queipo, que visitó'l festival anguaño, señaló qu'a Asturies «nun se-y vía», polo que calificó de «oportunidá perdida» pa la rexón ser la invitada d'honor. Trátase de la cuarta vez qu'Asturies tien esti papel en tola historia del festival --la primera foi en 1998 y les otres dos en 2003 y 2013--.
Asina lo señalaron la conseyera y el diputáu na Comisión de Cultura, Política Llingüística y Turismu de la Xunta Xeneral, onde Queipo preguntó a la conseyera pol papel d'Asturies nesta edición.
«El Principáu tuvo al altor nel añu en que volvía la normalidá al Festival de Lorient depués de dos ediciones marcaes pola crisis del coronavirus», afirmó Piñán, que destacó l'esfuerciu «considerable» del Executivu pa consiguir «una representación brillante sobre la base d'una programación cultural variada y plural».
Nesi sentíu, la conseyera repasó los grupos musicales, alcuentros lliterarios y esposiciones llevaes pol Gobiernu rexonal a la ciudá bretona, a lo qu'añadió la presencia institucional nos distintos actos y recepciones del festival, «onde la delegación asturiana foi l'absoluta protagonista».
Per otru llau, Queipo afirmó que «pa los que nos gusta'l folk y la cultura celta, el Festival de Lorient ye lo máximo qu'ún pue atopar». Sicasí, anque los artistes asturianos que participaron «cumplieron les espectatives», afirmó qu'esto chocó col papel del Principáu.
«Había xente perdío buscando l'estand d'Asturies», señaló'l 'popular', que criticó la falta d'ufierta hostelera. «Tola xente coincidía en qu'Asturies nun taba, nun se-y vía. Desaprovechemos descomanadamente una oportunidá que se da cada mui pocos años de promocionar Asturies, la so riqueza, la so cultura y la so gastronomía. Tolo que forma parte de la identidá asturiana», afirmó, pa calificar esta edición de «oportunidá perdida p'Asturies».
Nesi sentíu, Piñán reconoció la falta d'un restaurante asturianu ente la delegación rexonal en Lorient, pero esplicó qu'intentaron qu'hubiera esa presencia n'hasta trés ocasiones, con trés llicitaciones que quedaron desiertes y con delles conversaciones con empresarios hosteleros.
«La Conseyería nun pue obligar a empresarios asturianos a dir a Lorient, polo que tuvimos que reinventanos pa contratar a escanciadores y poder vender productos asturianos», afirmó, pa recordar que, con too, Asturies foi la protagonista del festival anguaño. Una cita per onde pasaron 800.000 persones y onde se vendieron más d'un millón y mediu de vasos onde apaecía que yera l'añu d'Asturies nel Festival Intercélticu de Lorient, explicó, informa Europa Press.