Abierta la inscripción de les Xornaes d'Estudiu de l'Academia de la Llingua

La Voz

AGORA

Vistas de la academia de la Llingua asturiana en Oviedo
Vistas de la academia de la Llingua asturiana en Oviedo ELOY ALONSO

Ufierten una güeyada amplia de l'asturianística que se fai dende fuera d'Asturies

03 oct 2022 . Actualizado a las 13:09 h.

Les Xornaes Internacionales d’Estudiu de l’Academia de la Llingua Asturiana algamen les cuarenta ediciones esti mes de payares de 2022. La Facultá de Filosofía y Lletres de la Universidá d’Uviéu acueye tres xornaes d’actividaes académiques, ente los díes 8 y 10, con ponencies, comunicaciones y presentaciones que, en xunto, ufierten una güeyada amplia de l’asturianística que se fai dende fuera d’Asturies.

De les ocho ponencies programaes, siete son obra de profesores n’universidaes norteamericanes y una vien dende una universidá británica: Sonia Barnes (Marquette University), María Turrero y Andie Faber (Drew University), Miriam Villazón (University of California), Eduardo García (University of Massachusetts Amherst), Julio Villa (University of Manchester), Francisco Fernández Rubiera (University of Central California), Covadonga Lamar (University of California) y Paquita Suárez Coalla (City University of New York).

Los temes, de la lliteratura a la sociollingüística y de la pragmática a la emigración asturiana, abarquen un panorama bayurosu en perspeutives d’investigación. La mesma variedá temática carauteriza a les nueve comunicaciones que tamién van presentase nes XL Xornaes Internacionales d’Estudiu y que completen un programa onde va haber espaciu pa tres presentaciones: la de los númberos más nuevos de dos de les revistes de l’Academia (Ciencies: Cartafueyos de Ciencia y Teunoloxía 12 y Lletres Asturianes 127) y del volume coleutivu Sound, Syntax and Contact in the Languages of Asturias, que dirixó y va presentar Guillermo Lorenzo, profesor de la Universidá d’Uviéu. Les persones matriculaes y qu’asistan a les Xornaes van recibir un certificáu acreitativu.