Una editorial asturiana va adaptar a xuegu de rol la obra d'Orwell «1984»

La Voz

AGORA

«1984: Thoughtcrime»
«1984: Thoughtcrime»

Va salir a la venta n'asturianu, castellanu y inglés y fíxose a comuña colos heriedes del escritor

04 oct 2022 . Actualizado a las 12:37 h.

Ediciones Radagast, una editorial asturiana que yá produxere con ésitu’l primer xuegu de rol n’asturianu, Depués d’Ochobre, pal que recaldaron más de 12.000 euros, ta acabante de presentar la campaña de mecenalgu en Verkami pa facer posible 1984: Thoughtcrime, el xuegu oficial de la novela d’Orwell 1984.

El xuegu de rol, que s’ambienta nel Londres distópicu de la novela d’Orwell 1984, va salir a la venta n’asturianu, castellanu y inglés y fíxose a comuña colos heriedes de George Orwell, que garantizaron que’l xuegu seya fiel dafechu a la obra orixinal. Trátase d’un xuegu de rol «survival sicolóxicu», nel que los xugadores van ponese na piel de ciudadanos de la Oceanía distópica de George Orwell qu’han sobrevivir a una dictadura tarrecible y implacable dominada pol Hermanu Grande na que tolos documentos escritos manipúlense con procuru y a los ciudadanos vixílenlos con cámares de contino.

Nel xuegu de rol, los xugadores van ser ciudadanos corrientes d’esti Londres distópicu: van tener mieu de les patrulles de la policía, van tapecer los sos pensamientos de la terrible Policía del Pensamientu, van intentar facer malabarismos mentales pa creyer la propaganda y que nun sospechen d’ellos y hasta van emplegar la «nuevafala», una variación de la llingua creada pol Partíu pa llimitar el pensamientu astrautu y controlar meyor el pensamientu de los ciudadanos.

Alcordances y nuevafala

Los personaxes, en cuenta de facese colos típicos «puntos d’esperiencia», van facese a base d’alcordances. D’esta manera, les esperiencies que vivieron los protagonistes puen condicionalos y da-yos una serie de ventayes o camudar les sos carauterístiques faciéndolos más o menos áxiles, sociales o intelixentes. No que cinca la nuevafala, desendolcóse una adautación cola que ye posible xugar si se quier. Son una serie de regles qu’adauten la gramática del castellanu, del asturianu y del inglés pa que pueda ser emplegada de mou intuitivu y, al empar, que faiga’l difícil el comunicar idees complexes. Pa facela posible, el desendolcu del xuegu contó cola participación de filólogos y filólogues de delles llingües.

1984: Thoughtcrime ye’l segundu títulu de rol d’Ediciones Radagast pero, al empar, trátase d’un proyeutu bien ambiciosu. Al igual que col otru xuegu, va haber una versión n’asturianu y otra en castellán; pero la editorial tien tamién la intención de sacar una edición llimitada n’inglés pa vender al restu del mundu.

El llibru, de 132 páxines tamañu foliu a tou color, inclui non namás les regles básiques pa xugar sinón, tamién, un compendiu d’información exhaustiva sobre la dictadura del Gran Hermano amás de trés aventures que puen facer los xugadores. Nuna delles vamos xugar como si fóremos los personaxes secundarios de la novela, n’otra los xugadores han ponese na piel de neños cola cabeza «comida» pola propaganda y na última d’elles van ser «proles», los ciudadanos más llibres pero tamién los más probes de la dictadura distópica. El xuegu va salir a la venta, en principiu, por 35 euros y al participar nel crowdfunding puede consiguise por 30 euros.