Suatea lleva'l currículu d'Infantil a la xusticia por nun recoyer conteníos sobre l'asturianu
AGORA
Denuncien que dos escueles de Mieres nun tienen profesor d'asturianu a pesar de la demanda de cuasi'l 100% de les families
06 oct 2022 . Actualizado a las 18:01 h.El sindicatu Suatea anunció al traviés de nota de prensa qu'interpunxo una demanda xudicial contra el currículu d'Educación Infantil por «nun respetar los derechos llingüísticos» al nun recoyer conteníos sobre l'asturianu o'l gallego-asturianu.
Nesi sentíu, la organización reclama a la Conseyería la modificación del Decretu 56/2022, del 5 d'agostu, que regula'l currículu d'Infantil. Según Suatea, nun incluyir nengún conteníu sobre les llingües propies d'Asturies «supón l'incumplimientu de la llexislación y frañar la tresmisión llingüística».
Per otru llau, denuncien qu'un mes depués de principiar el cursu escolar les escueles de Mieres Aniceto Sela y Santiago Apóstol siguen ensin dotación de profesoráu d'asturianu n'Educación Infantil (EI), anque cuasi'l 100% de les families demando recibir la matería. Amás, en Grandas y nel IES de Navia cubrióse la plaza de profesor de gallego-asturianu tovía la selmana pasada.
«Esta forma d'actuar de la Conseyería d'Educación nun dotando del profesoráu especialista necesario p'atender la demanda de la enseñanza d'asturianu n'Infantil ye sistemática, va xeneralízándose añu tres añu, y ye contraria a derechu», indicó Suatea, que ve nesta situación «criterios economicistes de recortes nel gastu a costa de los derechos de los padres y madres».
El sindicatu recuerda que la situación supón incumplir la Llei d'Usu y l'Estatutu d'Autonomía y reclamen a la Conseyería Educación la «inmediata dotación» de profesoráu d'asturianu nes dos escueles de Mieres, informa Europa Press.