La vicepresidenta segunda del Gobiernu central visita l'Academia de la Llingua
07 oct 2022 . Actualizado a las 16:33 h.La vicepresidenta segunda del Gobiernu central, Yolanda Díaz, mostró esti vienres n'Uviéu'l so apoyu a que se reforme l'Estatutu d'Autonomía d'Asturies pa recoyer la oficialidá del asturianu, al ser un marcu llegal «pacíficu y inclusivu dafechu».
Asina lo señaló en declaraciones a los medios enantes de caltener un alcuentru con 40 persones de los sectores llaborales asturianos, dientro de la so ronda de contactos pa presentar na rexón el proyectu de Sumar, y depués de visitar la sé de l'Academia de la Llingua Asturiana, onde conoció'l trabayu de la institución y aconceyó col so presidente, Xosé Antón González Riaño, y el so secretariu, Xosé Ramón Iglesias Cueva.
Preguntada por si esa visita yera una muestra del so apoyu a la oficialidá del asturianu, Díaz esplicó qu'en Sumar defenden «un país que ye plural, diversu culturalmente, que gocia d'una riqueza brutal que dacuando causa envidia dende los países estranxeros, y que ye plurillingüe».
«Tol mio apoyu a la reforma estatutaria, el reconocimientu de la oficialidá y a tolo que supón», indicó la vicepresidenta, que se declaró como gallegofalante y como tresmisora de la llingua de Rosalía de Castro a la so fía.
«Anque la mio fía vive en Madrid sigue falando y estudiando en gallegu. Creo que ye lo que tenemos que facer, porque España ye asina: diversa, plural y gocia d'una enorme riqueza llingüística y cultural. Y esto ye pacíficu y inclusivu dafechu», sentenció, informa Europa Press.