Cuasi 740.000 bañistes nes sableres de Castrillón

J. L.

AGORA

Playa de Salinas, Castrillón
Playa de Salinas, Castrillón

Con 2022 van yá 11 años consecutivos ensin llamentar nengún fináu nos arenales del conceyu

14 oct 2022 . Actualizado a las 14:39 h.

Les siete sableres de Castrillón recibieron a 736.473 usuarios ente'l 1 de xunu y el 30 de setiembre d'anguaño. La estimación d'arribación, estrayida del informe realizáu pol equipu de Salvamentu de Castrillón, nun llega a los datos rexistraos mientres los dos años de la pandemia cola movilidá ente comunidaes autónomes llendada (1.406.406 en 2020 y 1.094.079 en 2021). Sicasí, suponen una medría de más de 60.000 visitantes respectu al últimu añu previu al coronavirus, 2019, nel que se rexistraron 670.150 a les sableres.

Por arenales, la sablera de Salinas consolídase como'l referente del turismu playeru y representa el 62% d'esti tipu de turismu en Castrillón. Asina, la sablera de Salinas vuelve liderar n'arribación con 459.700 visitantes. Síguenlu San Xuan (133.300), Santa María (57.705), Bayes (50.505), Bahínas (12.256), Arnáu (11.757) y Munielles (11.250).

L'arribación media diaria d'esta temporada, según les estimaciones figuraes nel informe del coordinador del plan Sapla, ye de 3.831 persones na sablera de Salinas, 1.111 en San Xuan, 641 en Santa María, 651 en Bayes, 136 en Bahínas, 131 en Arnáu y 125 en Munielles. Tocantes a la distribución d'arribación d'usuarios por meses, xunetu y agostu refundiaron unes cifres bien similares, con 293.060 visitantes nel primer mes y 295.690 nel segundu. En xunu l'arribación a les sableres del conceyu foi tan solo de 16.715 persones, ente que la bona temperatura rexistrada mientres el mes de setiembre fizo qu'allegaren a los arenales 135.654 persones.