Los Reis d'España visitaron esti miércoles l'estand d'Asturies na Feria del Llibru de Frankfurt 2022
20 oct 2022 . Actualizado a las 08:52 h.Los Reis d'España visitaron esti miércoles l'estand d'Asturies na Feria del Llibru de Frankfurt 2022, onde Doña Letizia recibió como regalu un exemplar del discu '40 años al son de la nuestra música/40 anos al son da nosa música', onde se recueyen les meyores cuarenta canciones de la música n'asturianu y gallego-asturianu.
Esta mañana, na inauguración de la Feria del Llibru de Frankfurt 2022, onde España ye l'Invitáu d'Honor, los reis Felipe VI y Letizia detuviéronse nel estand d'Asturies, onde recibieron como regalu, ente otros, una llibreta de La Casina de la Traducción, de Valdés; el catálogu de la esposición 'Voces', onde se repasó la historia de la llingua asturiana; y el discu qu'editó'l Principáu pa celebrar la Selmana de les Lletres Asturianes del 2019, dedicada a la música.
El discu, onde se recueyen cuarenta temes que repasen les últimes cuatro décades de música n'asturianu, inclúi temes de Nuberu, Mariluz Cristóbal Caunedo, Dixebra, Seliquín, Felpeyu, Silvia Quesada, Skama la Rede, Anabel Santiago, Llan de Cubel, Bacotexo o Carlos Rubiera. Asina hasta un total de 40 grupos colos sos 40 cantares escoyíos por un xuráu d'espertos como los meyores de la música n'astruianu de les últimes décades.
Otra manera, una de les editoriales presentes nel estand d'Asturies, Hola de Lata, regaló-y a los Reis un exemplar de 'Tea Rooms. Mujeres obreras', de Luisa Carnés, autora de la xeneración del 27.
L'estand del Principáu ta decoráu con una semeya de la biblioteca universitaria y otra de la naturaleza de la tierra y con testos emblemáticos de la lliteratura asturiana en toles llingües d'Asturies, acompañaos de la traducción al inglés: Leopoldo Alas Clarín, Olvido García Valdés, Manuel Asur, Raquel F. Menéndez, Aurora García Rivas y Manuel García-Galano; informó Europa Press.