Les coses pol so nome, una campaña pa promover l'usu del asturianu al facer la compra
AGORA
La iniciativa, que va desarrollase hasta final d'añu, pretende dar visibilidá a los usos llingüísticos tradicionales en situaciones cotidianes
25 oct 2022 . Actualizado a las 17:31 h.La Conseyería de Cultura, Política Llingüística y Turismu llanza la campaña Les coses pol so nome, una iniciativa que pretende promover l’usu del asturianu a la hora de facer la compra dando visibilidá a les fórmules llingüístiques tradicionales pa los distintos productos.
El Gobiernu del Principáu, en collaboración cola Unión de Comerciantes d’Asturies, va distribuyir en tiendes y supermercaos medianos de tola rexón materiales divulgativos como cartelos y folletos qu’incluyen un vocabulariu pequeñu coles denominaciones tradicionales de la carne, el pexe o la fruta y verdura n’asturianu y eonaviegu. Llámame pita, Llámame arbeyu o Llámame andarica son dellos de los reclamos promocionales de la campaña pa tentar de fomentar l’usu de la llingua asturiana a la hora de facer la compra.
El director xeneral de Política Llingüística, Antón García, presentó esta mañana la campaña acompañáu pol director xeneral de Comerciu, Entamadores y Economía social, Julio González Zapico, y la xerente de la Unión de Comerciantes d’Asturies, Carmen Moreno.
La campaña va desarrollase hasta finales d’añu en dellos soportes y per dellos medios: repartu de cartelería y de folletos con un vocabulariu sectorial pequeñu, anuncios na TPA, anuncios en prensa escrita y dixital, cuñas en cadenes de radio, redes sociales, mupis nes ciudades más importantes, etc. Los materiales van repartise n’asturianu en bona parte del territoriu d’Asturies con una dotación específica n’eonaviegu pa la parte más occidental de la comunidá.
El sector del comerciu tien anguaño 12.185 empreses n’Asturies, de les que 8.570 son establecimientos minoristes y 3.615 comercios mayoristes. El volume de negociu supera los 11.100 millones d’euros y xenera cuasi 61.500 puestos de trabayu, ente emplegu por cuenta propia y asalariaos, lo que supón el 16 % de l’afiliación a la Seguridá Social nel Principáu.