El portal, que va ponese en marcha nos primeros meses del 2023, va sumar los conteníos referíos al patrimoniu inmaterial, la cultura castreña y un visor cartográficu de los bienes culturales protexíos
24 nov 2022 . Actualizado a las 13:14 h.La Conseyería de Cultura, Política Llingüística y Turismu va poner en marcha nos primeros meses del 2023 una web específica del patrimoniu inmaterial asturianu, que va atropar los fondos de los archivos de la tradición oral que quieran sumase al proyectu.
Amás, dientro poco va poder consultase al traviés de la rede conteníos sobre la cultura castreña, que, en palabres de la conseyera Berta Piñán, van constituyir «un verdaderu atles de los pueblos fortificaos asturianos» y van facilitar l'accesu a les investigaciones sobre la materia.
Too eso va confluyir l'añu próximu nun gran portal web que dende Cultura esperen axudicar enantes de qu'acabe anguaño y que se va poner en funcionamientu en 2023 pa recoyer tola actividá de los equipamientos xunto la información sobre'l patrimoniu, unificando asina la imaxe de la cultura asturiana.
Una web onde «van confluyir» los conteníos específicos que yá se punxeron en marcha, como los relativos a la información sobre los xacimientos arqueolóxicos y el Camín de Santiago, a los que se va sumar los conteníos referíos al patrimoniu inmaterial, la cultura castreña y un visor cartográficu de los bienes culturales protexíos.
Piñán lo anunció asina énte una entruga del diputáu del Grupu Mistu Armando Fernández Bartolomé na Comisión de Cultura sobre los oxetivos y plazos pa desenvolver esti portal. Nesi sentíu, el diputáu anunció que se va a mostrar favorable de que los presupuestos autonómicos futuros incluyan una partida pa esi procesu de dixitalización. Un procesu que «tien la coxuntura favorable de los fondos europeos».