Barbón ve un «insultu p'Asturies» que Feijóo plantee les autonómiques como la primer vuelta de les xenerales
AGORA
El presidente refugó que la situación política estatal afecte a los sos resultaos en mayu
23 dic 2022 . Actualizado a las 17:24 h.El presidente del Principáu, el socialista Adrián Barbón, calificó de «ofensa» y «insultu p'Asturies» que dende Xénova se tean planteando les elecciones autonómiques de mayu como una primer vuelta de les xenerales.
En declaraciones a los medios nel plenu de la Xunta Xeneral, al líder asturianu entrugáron-y sobre les declaraciones del presidente del PP, Alberto Núñez Feijóo, planteando los comicios rexonales como un plebiscitu ente Pedro Sánchez y él.
Barbón, anque afirmó desconocer eses declaraciones de Feijóo, indicó qu'esa pretensión supón pensar qu'en mayu son unes elecciones «con menos valir» cuando «nun tienen otru debate que nun sía'l puramente autonómicu».
«Si planteó eso'l señor Feijóo ye un insultu. Toi convencíu que los asturianos por arguyu y dignidá nun van dexar que les elecciones de mayu sían una primer vuelta de nada, porque son les nuestres elecciones, les d'Asturies», indicó.
Coles mesmes, refugó que la situación política estatal afecte a los sos resultaos en mayu porque «les elecciones autonómiques son autonómiques. La xente sabe qu'a les xenerales va votar n'avientu y qu'en mayu van escoyer al presidente d'Asturies, igual que lo faen nes municipales. Toi convencíu de que los asturianos y asturianos van votar conscientes de lo qué se vota en cada procesu electoral», señaló; según informó Europa Press.