Naz el Semando Fest, primer festival de música moza n'asturianu

E.G.B. REDACCION

AGORA

Lata de Zinc acueye'l 4 de febreru esti eventu que trata de puxar pol relevu xeneracional na música asturiana

10 ene 2023 . Actualizado a las 05:00 h.

El Semando Fest, primer festival de música moza n’asturianu, va celebrase na sala Lata de Zinc d'Uviéu el próximu 4 de febreru, a partir de les 19.30 hores. Esta iniciativa nueva trata de puxar pol relevu xeneracional na música asturiana, por ufrir un festival con un formatu orixinal qu’entemeza aspectos d’una gala colos d’un conciertu al usu, reivindicando les sales de conciertos como un espaciu afayadizu pal exposigue de la música de raigañu. Tamién ye l’eventu col que Musicasturiana.com quier festexar más de cinco años d’actividá.

Nel festival van participar Alicia Villanueva y Luis Álvarez Pola, dos de los nomes que protagonicen el relevu xeneracional na tonada; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu d’electrónica de raigañu. Son distintos estilos pa reflexar la diversidá sonora de la música asturiana y con una característica común: tener componentes menores de 34 años. 

Les entraes anticipaes yá tán a la venta en Musicasturiana.com a un preciu de 7 euros pa menores de 26 años y de 10 euros pa la demás xente. Semando Fest ta entamáu por Musicasturiana.com y Ixuxú Cultura; y patrocináu pola Conseyería de Cultura, Política Llingüística y Turismu al traviés d’Asturies Cultura en Rede, por Caja Rural de Asturias y pol Conseyu de la Mocedá del Principáu d’Asturies y el Conseyu la Mocedá d’Uviéu.

Siguiendo cola filosofía de da-y oportunidaes a les y los creadores xóvenes, toles persones implicaes nel Semando Fest son xente mozo, con edaes comprendíes ente los 18 y 34 años. D’esta manera, la diseñadora Cecilia Díaz encargóse de la identidá visual del festival y del diseñu de la cartelería; los presentadores del programa radiofónicu Héroes Ensin Nome, Yedra Riesgo y Raúl Alonso, van presentar l’eventu y entrevistar a los artistes enriba l’escenariu; y la fotógrafa avilesina Lucía Garó va facer les semeyes y el videu resume. 

«¿Por qué la mayoría de músicos que toquen nos principales eventos de la música asturiana tienen más de 20 años de carrera al costazu? ¿La mocedá conoz la música de raigañu? Hai muncho alumnáu nes escueles de música tradicional, pero ¿por qué nun salen nuevos grupos d’elles? ¿Cuándo rompió aquella fola de tantos grupos folk que surdieron nos años 90 o de grupos rock que nacieron nos 2000? En definitiva, ¿Hai relevu xeneracional na música asturiana?». Estes entrugues y más son les que faen que surda la necesidá de desendolcar un festival como esti, espliquen los organizadores. 

Amás, el Semando Fest quier abrir nuevos públicos pa la música asturiana. Al ser un eventu onde la mocedá ye la protagonista, busca que’l públicu más mozu conoza los soníos de raigañu d’Asturies y que puea ver como hai rapaces y rapazos de la so mesma edá creando cultura asturiana. Por último, supón un pasu más dientro de los 5 años de camín que Musicasturiana.com cellebra con esti eventu. Una trayectoria qu’entamó col llanzamientu de la tienda online y de la distribuidora dixital (2017), siguió cola creación del ciclu Amosando (2019) y cola reconversión de la web nel mayor portal dedicáu a la música n’asturianu y gallego-asturiano (2021).