García Arias ve na so Medaya «una reconocencia a tola xente que trabaya pola defensa de la llingua»

La Voz

AGORA

La ALLA que ye «un actu de reparación al asturianismu cultural»

15 ene 2023 . Actualizado a las 13:34 h.

El gallardonáu cola Medaya d'Asturies 2023, Xosé Lluis García Arias, afirmó que ve nesta concesión una reconocencia, al traviés de la so persona, a la llingua asturiana, a la xente que trabaya pol so futuru y al llabor filolóxicu desenvueltu pola Academia de la Llingua Asturiana, entidá que presidió ente 1981 y 2001.

El Principáu anunció esti vienres cuatro de les cinco medayes d'Asturies de 2023, ente les que ta'l primer presidente de l'Academia de la Llingua Asturiana, Xosé Lluis García Arias. En declaraciones a Europa Press, el catedráticu dixo qu'entiende esti gallardón como «una reconocencia a la llingua asturiana y a tola xente que trabaya pola defensa y l'afitamientu de la llingua».

Asina, ye un reconocimientu personal, «pero alredor de min había una xente mui importante que ta dando muestra de trabayu pol país», señaló, p'añadir que tamién supón destacar el trabayu filolóxicu desenvueltu pola Academia de la Llingua Asturiana, completáu agora col diccionariu etimolóxicu.

«El Principáu, el presidente y el Gobiernu van mui bien colos tiempos», dixo, pa ver tamién na Medaya «un niciu d'una política» a favor de la normalización llingüística y la «reconocencia esplicita y clara» de la oficialidá del asturianu.

El presidente de l'Academia de la Llingua Asturiana (ALLA), Xosé Antón González Riaño, afirmó esti viernes que la concesión de la Medaya d'Asturies a Xosé Lluis García Arias ye «un actu de reparación hIstórica al asturianismu cultural».

Nun apunte en twitter recoyíu por Europa Press, Riaño calificó a Xosé Lluis García Arias como'l «principal protagonista nel caberu mediu sieglu» d'esi movimientu. «Norabona, mayestru», esclamó'l presidente de l'ALLA nes sos redes.

Biografía

Nacíu en Teberga en 1945, García Arias ye ún de los principales estudiosos y difusores de la llingua asturiana. Doctor en Filoloxía Románica pola Universidá d'Uviéu, foi presidente de l'Academia de la Llingua Asturiana (ALLA) dende 1981 a 2001, tiempu nel que se completó'l trabayu básicu de fixación de la norma culta de la llingua asturiana cola publicación de les normes ortográfiques, la gramáticu y el primer diccionariu normativu.

Destaca na so trayectoria la redacción del Diccionariu Etimolóxicu de la Llingua Asturiana, col que l'asturianu rexistra un tratamientu científicu ente les llingües hispániques. Foi, amás, el primer presidente de Conceyu Bable, asociación pionera que nos últimos años de la dictadura franquista principió a reivindicar la normalización de la llingua asturiana y l'autonomía rexonal.

D'ella nació'l modernu asturianismu políticu y el movimientu cultural conocíu como Surdimientu, fundamentalmente lliterariu, pero que tamién destacó polo que supunxo pa la recuperación de les tradiciones asturianes y en modernizar la cultura rexonal.