La poeta Lourdes Álvarez, premiu Nacional de Lliteratura Asturiana

G.G.

AGORA

Nel acta, el xuráu xustificó la decisión de concede-y el Premiu a «una voz fuerte qu'alluma la historia y el destín de la muyer»

31 ene 2023 . Actualizado a las 16:17 h.

L'Academia de la Llingua Asturiana (ALLA), con un xuráu formáu tamién por representantes de la Universidá d'Uviéu y del Principáu, decidió concedéi a la poeta Lourdes Álvares el III Premiu Nacional de Lliteratura Asturiana.

El xuráu, presidíu pol presidente de l'ALLA, Xosé Antón González Riaño, tuvo formáu polos académicos Ana Cano, Xosé Ramón Iglesias y Carmen Muñiz; los profesores de la Universidá d'Uviéu Carmen Alfonso y Leopoldo Sánchez; el Premiu Nacional 2020 Xuan Xosé Sánchez Vicente; y, faciendo de secretariu'l director xeneral de Política Llingüística del Principáu, Antón García.

Nel acta, el xuráu xustificó la decisión de concede-y el Premiu a Lourdes Álvarez «pola calidá d'una obra poética singular desarrollada ensin priesa, perriba de modes y corrientes, que crea un mundu lliterariu orixinal y propiu».

Amás destacaron «una voz fuerte qu'alluma la historia y el destín de la muyer» escrita, amás, «nuna llingua mui bien ellaborada» que ye «a crear un mundu propiu que tresciende la realidá y que constitúi una perfecta muestra del valir estéticu y creativu de lo meyor de la lliteratura asturiana de güei».

El Premiu Nacional de Lliteratura, amás del correspondiente medayón conmemorativu y la edición d'un llibru de síntesis de la so obra, cuenta con una dotación económica de 5.000 euros. Lourdes Álvarez va recibir el so gallardón dientro de los actos del Día de les Lletres Asturianes, previstos pa la tarde del 5 de mayu, nel Teatru Campoamor; informó Europa Press.