L'actu entámalu La Comuna d'Asturies y la ponente ye Soledad Luque, de l'Asociación Todos los niños robados son también mis niños
09 mar 2023 . Actualizado a las 11:34 h.Soledad Luque, de l’Asociación Todos los niños robados son también mis niños, va dar una charla sobre unes víctimes del franquismu qu’avecen a escaecese: les madres a les que-yos quitaron los neños acabante nacer.
La cita ye esti vienres 10 de marzu, a les siete de la tarde, na Escuela de Comerciu de Xixón (C/ Francisco Tomás y Valiente), nel vestíbulu del segundu pisu. L’actu entámalu La Comuna d'Asturies, integrante de la Coordinadora Estatal d'Apoyu a la Querella Arxentina (CEAQUA).
Soledá Luque, profesora de la Universidá Carlos III de Madrid, lleva dende’l 2011 lluchando por atopar al so hermanu ximielgu robáu, Francisco. Depués de que los xulgaos españoles archivaren la denuncia, decidióse a organizar una asociación, Todos los niños robados son también mis niños, y a incorporar el so casu y otros más de desapaiciones a la Querella Arxentina. Ún de los oxetivos fundamentales pol que llucharon nesti ámbitu ye l’aprobación d’una Llei de Bebés Robaos, que llevaba dos años y mediu parada. La vuelta a la tramitación nel Congresu esti 28 de febreru pasáu, vuelve a poner d’actualidá esta cuestión, escaecida munches veces al falar de la memoria democrática.
«La memoria democrática nun ye monopoliu de los homes. A lo llargo de munchu tiempu, les muyeres viéronse como 'les compañeres de…', 'les madres de…', 'les hermanes de…', pero tamién foron suxetu activu y protagonistes na llucha contra la represión, sufriéndola elles mesmes (hai foses comunes de muyeres; muyeres exiliaes, encarcelaes, torturaes)», indiquen dende La Comuna, onde señalen tamién que les muyeres non solo foron víctimes del franquismu «por llevar dacuando un fusil y por acabar na cárcel, n’exiliu o nuna fosa, foron víctimes del franquismu pol fechu de ser muyeres y la represión que sufrieron incluye el robu de los sos fíos, circunstancia que tamién tien que formar parte de la memoria democrática d’esti país. Miles de neños y neñes foron víctimes d’apropiación, desapaición forciada y/o sustitución d’identidá en tola etapa franquista y inclusive depués».