La primer edición Premiu Pachín de Melás, de creación nueva, va publicase nes selmanes vinientes
22 mar 2023 . Actualizado a las 17:31 h.El Gobiernu d’Asturies abrió yá la convocatoria de nueve de los gallardones que la Conseyería de Cultura, Política Llingüística y Turismu promueve pa reconocer les meyores obres lliteraries y artístiques creaes n’asturianu o eonaviegu si ye’l casu. El Boletín Oficial del Principáu d’Asturies publicó les convocatories y el plazu de presentación de los trabayos va tar abiertu hasta’l 17 d’abril que vien.
Nes selmanes vinientes ta previsto que se publique amás la primer convocatoria del premiu Pachín de Melás, gallardón de creación nueva pa reconocer testos teatrales.
Los gallardones que tienen abiertu’l plazu de presentación d’obres son estos:
Premiu Xosefa Xovellanos de novela. Pueden presentase obres inédites de tema y estructura llibres con una estensión mínima de 75 páxines. Anguaño algama la 44 edición.
Premiu Xuan M.ª Acebal de poesía. Pueden presentase obres con una estensión mínima de 500 versos, con estructura y tema llibres y que nun se premiaren n’otros certámenes. Anguaño algama la 29 edición.
Premiu Máximu Fuertes Acevedo d’ensayu. Convocáu pa trabayos con estensión mínima de 50 páxines, inéditos y non premiaos n’otros concursos.
Premiu María Josefa Canellada de lliteratura infantil o xuvenil. Pueden presentase obres inédites de cualquier xéneru con una estensión mínima de 250 versos o 30 páxines.
Premiu Alfonso Iglesias de cómic. Les obres van poder ser d’estilu, tratamientu y tema llibres y pueden contener el desenvolvimientu d’una o delles histories. La estensión mínima ha ser de 50 páxines y han ser inédites.
Premiu Florina Alías a la meyor traducción. Reconoz el meyor trabayu de traducción al asturianu d’obres escrites en llingües diferentes al castellán. Pueden concurrir obres publicaes a lo llargo del 2022. Convocatoria:
Premiu Enriqueta González Rubín de narrativa moza. Reconoz noveles o colecciones de cuentos inédites y con una estensión mínima de 50 páxines o 100.000 caracteres.
Premiu Camaretá al meyor cantar. Pueden presentase cantares escritos n’asturianu o eonaviegu sobre melodíes orixinales o yá existentes y publicaes nel 2022 o hasta la fecha de la convocatoria. Cada solista o grupu pue presentar namás un trabayu.
Premiu Nel Amaro de teatru profesional. Pueden optar compañíes qu’estrenaren obres orixinales o versiones de títulos escritos orixinalmente n’otres llingües y que nun foren finalistes n’ediciones anteriores del gallardón. Pueden presentase obres n’asturianu o n’eonaviegu.