La Selmana de les Lletres va incluyir un músical infantil de Nacho Fonseca cola OSPA

G.G. OVIEDO

AGORA

La programación incluye la estrena del documental «Na firida del cementu. Vida y obra de Xosé Bolado», dirixíu por Ana Lamela

18 abr 2023 . Actualizado a las 16:28 h.

La 44 Selmana de les Lletres Asturianes dedicada al poeta Xosé Bolado va celebrase ente'l 28 d'abril y el 6 de mayu y va incluyir na so programación el musical escolar «Historia d'un bosque», de Nacho Fonseca, y nel que va participar la Orquesta Sinfónica del Principáu d'Asturies.

La representación va cuntar con dos pases, ún destináu a públicu escolar, y otru abiertu y gratuitu pa tol públicu interesao'l xueves, 4 de mayu, a partir de les 19.30 hores nel Teatru de la Llaboral. La Selmana va rindir homenaxe a la figura del poeta y críticu lliterariu Xosé Bolado, fallecíu en mayu del 2021. Xosé Bolado, académicu de la llingua asturiana y profesor, ye una figura central de la recuperación llingüística y lliteraria d'Asturies na Transición.

La programación incluye la estrena del documental «Na firida del cementu. Vida y obra de Xosé Bolado», dirixíu por Ana Lamela, y tamién la edición de dos llibros conmemorativos alredor de la contribución decisiva que la figura de Xosé Bolado supunxo pa la llingua y la lliteratura asturianes. Asina, «Xosé Bolado. Fálame duce» recueye la semblanza que distintos amigos y personalidaes del mundu de la cultura tracen sobre l'autor uviedín, no personal y tamién na aportación que fixo como poeta, como militante sindical y políticu y na so dimensión de críticu y estudiosu de la llingua y de la lliteratura n'asturianu. La obra, coordinada por Marta Mori, edítala'l Gobiernu del Principáu d'Asturies con realización editorial de Trabe.

La segunda de les publicaciones que va ver la lluz coincidiendo cola celebración de la Selmana de les Lletres va ser «Palabres blanques. Testos d'Historia y Crítica lliteraria (Esbilla)», una compilación de los artículos publicaos por Bolado na so faceta de críticu lliterariu. Ye una edición preparada por Marta Mori y coeditada pol Principáu d'Asturies y Trea. Amás, l'espectáculu poéticu musical 'Flores escontra'l desamparu' va facer homenaxe a la obra de Xosé Bolado nel escenariu del Teatru de la Llaboral el llunes, 1 de mayu, a partir de les 19.00 hores, con entrada gratuita pa tol públicu interesao.

Al otru día, nel Auditoriu As Quintas d'A Caridá, les autores en gallego-asturianu tamién van recordar a Bolado nel recital poéticu 'Hailas' cola participación de Conchita Álvarez Lebredo, María José Fraga, Marisa López-Diz y el dúu Mestura, que va encargase de poner la banda sonora al alcuentru. Na nómina amplia de voces que van tomar parte nel tributu públicu a Xosé Bolado nun van faltar los y les poetes de les xeneraciones más moces de la lliteratura n'asturianu.

El sábadu 6 de mayu van axuntase a partir del mediudía nel Muséu Nicanor Piñole de Xixón nel alcuentru «Fueyes de color infinitu». El públicu va poder disfrutar de les reflexones y los poemes d'Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez. El grupu Tierra y Eco va ser quien s'encargue de poner música en directo al alcuentru. Amás, por cuenta de la 44 Selmana de les Lletres Asturianes, la Conseyería de Cultura, Política Llingüística y Turismu edita tamién el cómic «Gladius», del humorista gráficu Ernesto García del Castillo, Neto, en gallego-asturianu.

Esti cómic pal estremu occidental d'Asturies y «Xosé Bolado. Fálame duce», pa lo demás de la comunidá, son les obres que se van poner gratuitamente a disposición de les persones que compren un llibru o un discu n'asturianu o gallego-asturianu el vienres 5 de mayu, Día de les Lletres Asturianes. Un total de 57 llibreríes y tiendes de discos del Principáu d'Asturies collaboren esti añu cola Dirección Xeneral de Política Llingüística na promoción y celebración de les Lletres.

La Selmana de les Lletres Asturianes, homenaxe públicu y institucional a la creación lliteraria en llingua asturiana, celébrase cada mes de mayu dende 1980 y foi configurándose como un acontecimientu cultural de muncha importancia y vitalidá. Trátase d'un eventu participativu onde se dan la mano lo lliterario, lo festivo y lo institucional. A esta celebración organizada pol Gobiernu d'Asturies axúntense munches otres instituciones y participen de manera especial centros educativos, llibreríes, editoriales, escritores y medios de comunicación, informa Europa Press.