El 23% de los asturianos carez dolor crónicu

L.O.

AGORA

El dolor en la zona lumbar es uno de los motivos de consulta en Atención Primaria más frecuente.
El dolor en la zona lumbar es uno de los motivos de consulta en Atención Primaria más frecuente. iStock

El Barómetru del Dolor Crónicu n'España 2022 revela un crecimientu nacional d'hasta ocho puntos respective de les cifres d'anteriores estudios y confirma'l so «gran impactu nos individuos que lu carecen»

26 abr 2023 . Actualizado a las 14:55 h.

Nueve millones d'adultos, el 25,9%, tienen dolor crónicu, que se presenta sobremanera n'estremidaes, articulaciones y llombu y a bona parte tórga-yos actividaes cotidianes como llevantase, sentase y vistise. Sicasí, más d'una cuarta parte, un 27,1 %, desconoz la so causa. Nel casu d'Asturies, esti porcentaxe asítiase nel 22,8%. En rellación al sexu, les muyeres presenten una mayor prevalencia de la enfermedá (30,5%) al respective de los homes (21,3%).

El Barómetru del Dolor Crónicu n'España 2022 revela una medría d'hasta ocho puntos al respective de les cifres d'anteriores estudios y confirma'l so «gran impactu nos individuos que lu carecen», yá qu'amenorga «el so estáu físicu, mental y social», resumió Inmaculada Failde, directora del Observatoriu del Dolor Crónicu, impulsor del analís xunto a la Fundación Grünenthal.

Pa que seya consideráu como talu, el dolor crónicu tien de producise de forma continua más de cuatro díes a la selmana y persistir mientres siquier trés meses. Puede ser de siete tipos: primariu -causáu por una alteración funcional o malestar emocional por causes biolóxiques, psicolóxiques o sociales; oncolóxicu; postquirúrxicu o postraumáticu; neuropáticu o orofacial y cefalea.

Más en muyeres

Ye más frecuente en muyeres -30,5%- que n'homes -21,3%-. Por edá, los más afectaos, según esti estudiu realizáu con una amuesa de 7.058 persones, son los que tienen de 55 a 75 años, allugándose la media d'edá nos 51,5. Los de 18 a 34 años son los que tienen la tasa menor (18,8%), pero sicasí tienen la mayor prevalencia (11,2 %) de dolor continuu non crónicu, qu'afecta a un 7,7 % de los adultos. El dolor llumbar ye'l más diagnosticáu, en concretu nun 58,1% de los casos, siguíu de la contractura muscular (50,6%) y el cervical (46,2%), pero un 27,1% desconoz el so orixe, lo qu'atrabanca'l so abordaxe terapéuticu.

Un terciu del dolor alcuéntrase nes estremidaes y articulaciones, un 28% nel llombu, el 13,2% ye xeneralizáu y el 10,6% dase nel pescuezu y cervicales. Pal 57,6%, ye bien intensu, pa un terciu ye moderáu y pal 4,4% resulta insoportable. Suel durar de media 6,8 años, anque la mediana asístiase nos cuatro.

Causa de baxa pal 28%

El carecimientu compromete a munchos la so capacidá pa llevar a cabu actividaes cotidianes, y un 10,7% precisa ayuda pa desempeñales. Seis de cada diez tienen dalguna dificultá pa llevantase, daqué más de la metá pa sentase y un 44,7% para vistise; l'actividá na que tienen una mayor autonomía ye alimentase, que resulta complicao pa un 16,4%.

Amás, el dolor físicu conviértese dacuando nun supliciu mental: el 22,2% desenvolvió depresión y un 27,6%, ansiedá. Ensin escaecer el so enorme impactu económicu: en 2014, con cifres más baxes, los gastos derivaos xubieron a 16.000 millones d'euros añales, un 2,5% del PIB. Un 28,6% de los encuestaos tuvo de baxa nel últimu añu, porcentaxe que xube al 46,5% nos trabayadores remuneraos. A cuasi un terciu emburriólu a abandonar la so ocupación y al 17,3 % a cabiar el so puestu de trabayu.

Tamién-yos obliga a facer un altu usu del sistema sanitariu; un 86,7% foi a Atención Primaria nel últimu mes, un 69,4% al especialista -sobremanera al traumatólogu, qu'atropa'l 47,7% de les visites- y un 45% a urxencies. A pesar a la so peralta prevalencia, namás ún de cada cuatro pacientes llega a una unidá del dolor, qu'amás de tar «colapsaes», pertenecen na so mayoría a centros privaos: 197 de les 417 repartíes per España (el 47 %) son públiques.

A nivel nacional esiste un hospital con Unidá del Dolor per cada 113.748 habitantes, pero difier enforma según la comunidá, yá qu'en Baleares baxa a 1/64.419 habitantes y en Ceuta y Melilla a 1/ 82.533 y 1/83.196, respectivamente, mientres qu'en Murcia dispárase a 1/304.528 y n'Aragón a 1/262.917. La Rioxa y Ceuta y Melilla solo tienen en centros públicos, pero los cinco d'Aragón son d'ámbitu priváu. Cantabria tien el 75% de les sos unidaes en centros públicos y Castiella-La Mancha el 60%, pero en Baleares y Asturies tienen más guarda los centros privaos (68% y 67%).