Güei, primer vienres del mes de mayu, festexamos, y van yá 44 años, les Lletres Asturianes. Y facémoslo con normalidá.
Dempués de tres años nos que l´andanciu torgó la celebración del actu cola vitalidá, allegría y participación popular que yeren tradicionales, nesti 2023 recuperamos dafechu la normalidá: a les 7 de la tarde nel Teatru Campoamor d´Uviéu les puertes tarán abiertes pa tola xente que quiera rindir homenaxe a la nuestra llingua acompañando a l´Academia na so xunta estraordinaria.
Cola solemnidá que ye vezu, abrirá la sesión el gaiteru Fernando Cárcaba, ganador del troféu MacCrimmon en Lorient, dempués la poeta Lourdes Álvarez recoyerá´l III Premiu Nacional de Lliteratura Asturiana y l´espertu en proyeutos dixitales, estudiosu de la sociollingüística asturiana y activista David Guardado ingresará como académicu de númberu de la institución; darréu, el Presidente de l´Academia dará cuenta del trabayu fechu nel añu y analizará la situación actual del asturianu y del eonaviegu pa, dempués d´escuchar dellos testos lliterarios, poner el ramu al actu coles canciones de Silvia Quesada. Too, otra vegada, con normalidá.
Agora sólo falta que los partíos políticos, que van tar representaos nel actu polos sos cabezaleros, entiendan que lo único que nun ye normal ye que sólo n´Asturies siga ensin cumplise l´artículu terceru de la Constitución que votemos va yá cuarenta y cinco años y que manda facer oficiales, nos sos Estatutos, les llingües propies de cada Comunidá.
Lo dicho: vémonos güei nel Teatru Campoamor pa festexar con normalidá les nuestres llingües, naguando por que l´asturianu y l´eonaviegu algamen la normalidá constitucional yá.
Xosé Ramón Iglesias Cueva, Secretariu de l´ALLA