CCOO d’Asturies tará esti sábadu, otra vuelta más, na manifestación convocada pola Xunta pola Defensa de la Llingua Asturiana pa reclamar la oficialidá. Vamos siguir faciéndolo hasta que se ponga remediu a esta inxusticia histórica. Asturies merez la reconocencia de la so llingua. Y la mayor reconocencia ye la oficialidá. Una reconocencia imprescindible.
El compromisu del sindicatu en defensa de la nuestra llingua ye firme y vien de lloñe. Ta recoyíu nos nuestros estatutos y en destremaos documentos congresuales. Y demostrámoslo na práutica col so usu y cola participación activa en toles iniciatives y movilizaciones que vienen faciéndose dende hai décades.
La oficialidá nun supón nenguna perda de derechos nin la imposición d’obligaciones; cenciellamente, garantizará la igualdá a quien quiera usar l’asturianu. Ye la fórmula qu’afita la Constitución y la única manera d’amparar la nuestra llingua. Porque d’eso falamos, de protexer el nuestru patrimoniu, la nuestra cultura. Los argumentos a la escontra de la oficialidá resúmense en dos pallabres: intolerancia y prexuicios.
Tenemos cerca un bon exemplu. La consideración del gallegu como llingua oficial de la comunidá vecina, que tan bien defendió y sofitó la derecha, nun significó ruina económica nenguna (tolo contrario, xeneró emplegu y riqueza), nun polarizó la sociedá, curió y espardió la so llingua vernácula. N’Asturies nun s’entiende la postura del Partíu Popular, negando un fechu cultural ciertu y claru; y la de Vox ye llamentable, asitiando a la llingua asturiana nel centru de la so diana política.
Ponse fin a esta llexislatura ensin aprobar esta asignatura. Agora, los asturianos y les asturianes tamos llamados a les urnes el 28 de mayu p’anovar la Xunta Xeneral del Principáu. Si queremos que’l nuestru patrimoniu cultural sobreviva hai que da-y la mayor proteición. Sedría irresponsable nun lo facer. Y ye agora cuando vamos tener la oportunidá. El candáu nes puertes que zarren el pasu a la oficialidá tien que frayase, dende’l pautu y l’alcuerdu.
L’Estatutu tien más de cuatro décades y llegó’l momentu de reformalu, actualizalu y adautalu a les necesidaes y realidaes d’anguaño, p’allugalu nel sieglu XXI. La parálisis nun dexa avanzar. Y el bloquéu que viemos l’añu pasáu ye lo que provoca. Asturies nun tien que ser más pero tampoco pue ser menos que les demás comunidaes autónomes.
CCOO defende una reforma qu’enanche l’autogobiernu y los derechos de la ciudadanía p’avanzar n’igualdá, que blinde’l diálogu social, que facilite la realización de referendos y l’aprobación de decretos-llei, que dea puxu a la iniciativa llexislativa popular, faga de so’l calter llaicu de la enseñanza, reconoza los destremaos modelos de familia, actualice’l nuestru sistema electoral y que, de toes toes, declare la oficialidá de la llingua.
Si queremos qu’Asturies sía una tierra d’oportunidaes, con un proyeutu económicu, social y de futuru dignu pa les xeneraciones vinientes, ye imprescindible un nuevu Estatutu d’Autonomía que nos dexe avanzar en derechos, en nueves competencies y tamién recuperar daqué autoestima, dexando de dar de llau a lo que somos, reconociendo con arguyu que tenemos un patrimoniu cultural muncho valoratible que protexer, con raigones fuertes y personalidá propia, abiertu a la diversidá y a la convivencia y dende’l que mirar a una llende meyor colos valores de la igualdá, la cooperación y la solidaridá.
Asturies saldrá ganando.
José Manuel Zapico, Secretariu xeneral de CCOO d’Asturies.