Asturies va recibir 11,3 millones pa formación dixital y meyores na equidá educativa

El Conseyu de Ministros aprobó destinar 11,3 millones a Asturies pa la formación dixital y la meyora de la equidá nel sistema educativu dientro d'una partida de 566 millones pal conxuntu de comunidaes autónomes distribuyida en cinco partíes: Programa Códigu Escuela 4.0, el Programa PROA+ y el Programa d'Unidaes d'Acompañamientu; llibros de testu; y Educación Inclusiva.

Asina, el Programa Códigu Escuela 4.0 va recibir 298,4 millones -5,9 nel casu d'Asturies- pa formar en robótica, programación y nueves tecnoloxíes a los 5,5 millones d'alumnos de segundu ciclu d'Infantil, d'Educación Primaria y d'Educación Secundaria matriculaos en centros públicos y concertaos.

No que fai al sofitu a families y alumnáu con dificultaes aprobóse una inversión de 173 millones d'euros, de los que 5,2 millones son p'Asturies; el programa PROA+ va contar con 118 millones, 2,8 millones d'ellos pa Asturies; y el Programa d'Unidaes d'Acompañamientu dotóse con 55 millones d'euros qu'inclúin 748.600 d'euros pal Principáu.

Amás, aprobóse una partida p'Asturies de cerca de 967.000 d'euros, de los 58,5 millones d'euros destinaos a les comunidaes autónomes p'ayudar a les families a encarar el gastu que suponen los llibros de testu y material escolar, incluyíu los materiales dixitales, del alumnáu de centros sosteníos con fondos públicos.

A lo último, el Principáu va recibir 825.000 euros de los 36 millones d'euros aprobaos pa distribuyir ente les comunidaes pal programa de Cooperación Territorial d'Educación Inclusiva.

---

---