Asturies celebra'l Día de los Museos con actividaes especiales

G.G.

AGORA

Visita a los laboratorios y litoteca del Museo del Jurásico de Asturias (MUJA)
Visita a los laboratorios y litoteca del Museo del Jurásico de Asturias (MUJA)

Dellos equipamientos programen delles visites ya iniciatives pa la fin de selmana

15 may 2023 . Actualizado a las 21:43 h.

El Centru d'Arte Rupestre de Tito Bustillo, el Centru de Recepción ya Interpretación del Prerrománicu Asturianu, el Muséu Etnográficu de Grandas de Salime «Pepe'l Ferreiro», el Muséu del Xurásicu d'Asturies (MUXA) y el Parque de la Prehistoria de Teberga celebren el Día Internacional de los Museos con actividaes y visites especiales el 20 y 21 de mayu. Estos equipamientos, dependientes de la Conseyería de Cultura, Política Llingüística y Turismu y xestionaos pola Sociedá Pública de Xestión y Promoción Turística y Cultural del Principáu d'Asturies, prepararon una programación con delles actividaes a cuenta de la celebración. Amás, el 18 de mayu la entrada a toos estos centros ye gratuita.

El Centru d'Arte Rupestre de Tito Bustillo ufierta na fin de selmana un taller familiar gratuitu centráu na sostenibilidá na Prehistoria. En «Pasáu sostenible: collecha creativa» los participantes van conocer cómo los nuestros antepasaos aprovechaben los recursos naturales, lo que va sirvir d'inspiración pa fabricar un marcapáxines que van llevar pa casa. El taller, con places llendaes, va realizase'l 20 y 21 de mayu, a les 12.00 y 16.00 hores, y puede retirase primero la invitación na web centrotitobustillo.com.

Nel Centru del Prerrománicu Asturianu'l públicu infantil de 5 a 12 años va poder construyir con pieces d'espluma monumentu del Prerrománicu Asturianu, el 20 de mayu, a les 17.00 hores. En «Pilpayu Medieval. ¡Construyendo a lo grande!» van afayar les característiques d'esta arquitectura y los sos procesos y técniques constructives. Pa participar, puede retirase invitación previa na web centroprerromanicoasturiano. com. Ye de destacar que'l 21 de mayu, nel horariu d'apertura del Centru, el públicu infantil y familiar va poder facer manualidaes y construcciones de dalgún de los elementos del Prerrománicu Asturianu de manera llibre o xugar col Alquerque o Latrunculi, precursores de xuegos de mesa modernos.

Centro de Recepción e Interpretación del Prerrománico Asturiano
Centro de Recepción e Interpretación del Prerrománico Asturiano

Pela so parte, nel Muséu Etnográficu de Grandas de Salime «Pepe'l Ferreiro», el 20 y 21 de mayu, va haber talleres demostrativos de tornería y forxa y una visita pa conocer «Lo que'l muséu escuende». Arturo Iglesias, el torneiro del muséu, va amosar el funcionamientu del tornu de media vuelta y el tresformamientu de la madera en recipientes d'usu domésticu'l 20 de mayu, de 11.30 a 14.00 y de 16.00 a 19.00 hores, en pases de 20 minutos. El 21 de mayu va encender la fragua del muséu de 11.30 a 14.30 hores, pa conocer l'oficiu del ferreiro. Pa ello va haber demostraciones en directo de la realización d'un clavu, en pases de 20 minutos, nes que'l públicu va conocer les ferramientes, producciones y los elementos que yeren indispensables nel taller del ferreiro. Recuérdase qu'estes demostraciones d'oficios tradicionales nun tienen costu adicional cola entrada al Muséu.

Amás de percorrer la esposición permanente, los visitantes van poder aportar a espacios zarraos davezu al públicu como los talleres y almacenes y descubrir los llabores internos de la institución y cómo lleguen a tar espuestes les pieces que vemos en «Lo que'l muséu escuende», que se va celebrar el 20 y 21 de mayu a les 12.00 hores. Pa esta visita, con places llendaes, puede retirase entrada primero al traviés de la web museodegrandas.es.

Muséu del Xurásicu d'Asturies y Parque de la Prehistoria de Teberga

El 20 y 21 de mayu'l públicu familiar va poder participar nel MUXA nel taller «Piedra, papel, pincel», con pases a les 11.00, 12.00, 13.00, 16.00 y 17.00 hores pa conocer ya interpretar la información que nos apurren los fósiles; y el públicu adultu va poder sumase a les 12.30 hores a la visita los llaboratorios y litoteca col equipu científicu del Muséu. Pa dambes actividaes gratuites, con places llendaes, habrá de retirase invitación na recepción del MUXA'l mesmu día de l'actividá, per orde de llegada. La fin de selmana tamién puede completase la visita a la esposición permanente, col so costu habitual, col serviciu gratuitu d'audioguíes al traviés de móvil pa públicu adulto o con una visita autoguiada, tamién al traviés de móvil, pa públicu familiar.

Entrada Parque de la Prehistoria de Teverga
Entrada Parque de la Prehistoria de Teverga

El Parque de la Prehistoria de Teberga entama'l 20 de mayu con «La Ponte-Ecomuséu» y el Conceyu de Santo Adriano una xornada gratuita sobro bioconstrucción nel pasáu y nel presente qu'empieza a les 12.00 hores. L'actividá inclúi una visita a los abrigos de Santo Adriano, na que se va esplicar los distintos espacios d'hábitat de la Prehistoria y los materiales y técniques constructives que pudieron utilizase, poniéndolos en rellación con construcciones más modernes como horros o teitos; pela tarde, nel Parque de la Prehistoria y de la mano de l'Asociación d'Amigos del Horru Asturianu, el públicu va conocer les funciones y característiques d'esti elementu de l'arquitectura mueble asturiana que s'atopa nos esteriores del equipamientu y va realizar un modelu d'horru recortable tres la visita.

Amás, el 21 de mayu, a les 13.00 hores, va haber un taller gratuitu de «Prehistochapes» pa públicu infantil de 4 a 11 años; y a les 16.00 hores Toño Argüelles va presentar la so novela ambientada na Prehistoria, "El corazón rojo". La so visita al Parque de la Prehistoria de Teberga sirvió d'inspiración pa la última obra del escritor asturianu, médicu de formación y estudiosu de la socioloxía y la historia, que tamién publicó «El año que comimos una turista rubia», «Lobos disecados» y «Princesas de ojos azules». Pa participar na xornada del 20 de mayu y nel taller «Prehistochapes», con places llendaes, ye necesario inscribise primero na web parquedelaprehistoria.es.