La Confederación Hidrográfica del Cantábricu actúa nos regueros de Fonte del Noval y d'El Castru en Xixón
AGORA
Estos trabayos llévense a cabu nel marcu del conveniu robláu col Conceyu de Xixón pal desenvolvimientu d'actuaciones de conservación y caltenimientu de calces
15 may 2023 . Actualizado a las 12:42 h.La Confederación Hidrográfica del Cantábricu empecipió los trabayos de conservación y caltenimientu de calces nel regueru de la Fonte del Noval y nel regueru El Castru en Xixón.
Estos trabayos llévense a cabu nel marcu del conveniu robláu col Conceyu de Xixón pal desenvolvimientu d'actuaciones de conservación y caltenimientu de calces nel términu municipal, nel que se contempla una inversión de 1.520.000 euros. Desque empezaron les actuaciones el pasáu 1 d'agostu, invirtiéronse 567.312,23 euros.
Nel regueru de la Fonte del Noval trabáyase en dos zones, una na cabecera del regueru y otra nes proximidaes a la so desaguada nel regueru Veranes. La estensión de l'actuación ye d'unos 2.300 metros, de los que 1.700 metros son d'ámbitu rural y 600 metros d'ámbitu urbanu.
La zona d'actuación nel regueru El Castru tien unu llargor d'unos 260 metros, de los cualos, 210 metros son d'ámbitu urbanu y 50 metros d'ámbitu rural.
Estes dos actuaciones cuenten con un presupuestu envaloráu de 32.500 euros y tienen como finalidá garantizar la capacidá de desagüe de les infraestructures de camín presentes na zona. Pa ello, los llabores céntrense na estracción de restos vexetales abasnaos pola corriente y na retirada d'árboles cayíos, o en riesgu de cayida, sobro'l calce.