Tazones celebra les xornaes de la mar y de la ría

G. G.

AGORA

Tazones
Tazones

La llocalidá acueye per primer vegada un concursu d'escanciadores

17 may 2023 . Actualizado a las 14:00 h.

Tazones celebra esta fin de selmana les Xornaes de la Mar y de la Ría, qu'entama per primer vegada l'Asociación de Comerciantes y Hosteleros de Tazones en collaboración col Conceyu de Villaviciosa, con un menú gastronómicu que tien como protagonistes a los productos de la mar y de la Ría de Villaviciosa.

El programa d'actividaes va empezar el sábadu a les 18.30 hores col Concursu d'Escanciadores de Tazones, que se celebra per primer vegada y que va ser puntuable pal XXX Campeonatu d'Escanciadores d'Asturies, de manera que'l conceyu de Villaviciosa va allugar dos pruebes d'esti prestixosu Campeonatu, l'habitual que se celebra nel marcu de les Fiestes del Portal en setiembre o nel Festival de la Mazana cada dos años, y agora la de Tazones. Como en toles pruebes del campeonatu oficial, va haber 10 premios na categoría xeneral, trés premios pa escanciadores llocales y un premiu especial na categoría de menores de 25 años.

Al concursu siguirálu l'actuación del conocíu actor Alberto Rodríguez, que va facer tamién de maestru de ceremonies na entrega de premios del Concursu d'Escanciadores. A partir de les 21 hores, la organización va ufiertar una gran sardinada que va facer les delicies d'asistentes hasta fin d'esistencies.

El Grupu Picos d'Europa va amenizar la verbena que va tener llugar dende les 23 hores y que va poner el ramu a la nueche del sábadu. Toes estes actividaes van llevase a cabu na carpa instalada nel aparcamientu de Tazones.

Tocantes a los menús gastronómicos, cinco van ser los restoranes participantes: El Portal de Tazones, Las Terracas, La Sirena, Carlos V y El Uría. Toos ellos van ufiertar mientres el sábadu y el domingu menús n'horariu de comida y cena col mariscu y el pexe como protagonistes con un preciu únicu de 38 euros. Tolos menús inclúin vinu y sidra D.O.P Sidra d'Asturies. Aconséyase acutar primero.