Empiecen les obres del área d'autocaravanes pa 10 vehículos xunto al Muséu de la Minería
AGORA
L'área nueva d'autocaravanes va ser la segunda del conceyu
20 may 2023 . Actualizado a las 05:00 h.Les obres d'acondicionamientu d'un Área de Servicios d'Autocaravanes con capacidá pa 10 vehículos nes proximidaes al Muséu de la Minería y la Industria (MUMI), en L'Entregu, empezaron esta selmana. El proyectu, presupuestáu en 7.000 euros, financiase con cargu al remanente municipal de tesorería y tien un plazu d'execución d'un mes.
L'área va contar con una plataforma de carga y descarga con rexa pal depósitu de les agües fecales, que va disponer d'un sumidoriu conectáu a la rede d'alcantarelláu pal vaciáu del depósitu del inodoru, xunto con un grifu pa la so llimpieza. Va disponer tamién d'un segundu grifu pal suministru d'agua potable.
La construcción d'esta área d'autocaravanes va llevase a cabu amortizando dalgunes de les actuales places del aparcaderu pa turismos allugáu pela redolada al MUMI pero ensin afectar a la ufierta global d'aparcamientu de la zona, que va siguir siendo igualmente abonda.
La nueva área d'autocaravanes va ser la segunda del conceyu, que yá cuenta con una nel aparcamientu del Pozu Entregu, con capacidá pa trés vehículos, que lleva funcionando dende l'añu 2010.
Esta actuación tien como finalidá «potenciar el turismu nel conceyu y atrayer visitantes venceyaos a un sector en puxanza nel nuesu país como ye'l de les autocaravanes, nun allugamientu afayadizu pola so proximidá al Muséu de la Minería y al circuitu de ciclocrós», señalaron fontes del Conceyu. «Ye amás un entornu tranquilu, apartáu del ruíu del cascu urbanu, con accesu a la sienda del paséu fluvial del Nalón», destacaron.