Xaime Martínez llanza Cierva y Culiebra, pa «repensar el mundu» n'asturianu

L.O.

AGORA

El sellu estrénase con un selección de cantares de chigre de Rodrigo Cuevas y otra de testos diabólicos de tola tradición asturiana

24 may 2023 . Actualizado a las 05:00 h.

Con una campaña de soscripción y micromecenalgu llánzose Cierva y culiebra ediciones, un sellu nuevu de lliteratura y pensamientu n’asturianu. Según anuncien na páxina web del proyectu, la nueva editorial quier editar llibros qu’ayuden a «repensar el mundu», pero ensin poner llendes xenériques: «habrá lliteratura, pero tamién pensamientu y non ficción.

Na nota destaquen que la característica común a los llibros sedrá que van ser mui cuidaos, mesmo nel diseñu qu’a nivel editorial, pa que lleguen a los llectores que tienen que llegar, enanchen la base de xente que llee n’asturianu y replanteguen «la manera na que vemos les coses».

El proyectu yá algamó, una selmana depués, el 70% de la cantidá que requier la primera ronda de financiación, qu’acaba en 30 díes. La campaña de micromecenalgu va ayudar a cubrir el costu d’aniciu: diseñu de la colección, espardimientu del sellu ente’l públicu al públicu, envíu de los primeros llibros a imprenta y creación d’una bases de soscriptores.

Los dos primeros llibros que va editar Cierva y culiebra, y que van llegar a los mecenes del proyectu, son La Xorda. Nuevos cantares de chigre, con prólogu y selección de Rodrigo Cuevas, «una renovación de los antiguos cancioneros pa cantar nos chigres y sidreríes, con una escoyeta de cantares vieyos y nuevos fecha pol músicu Rodrigo Cuevas», y Nun vaya ser el demoniu. El diablu n’Asturies, de varios autores, que recueye testos diabólicos de tola tradición asturiana que van dende la Edá Media hasta’l sieglu XXI, mesmo inéditos que yá espublizaos.

El proyectu diríxelu l'escritor ya investigador Xaime Martínez y nel so conseyu editorial tán espertos en comunicación, diseñu, en tresformación dixital y en lliteratura como Diego Álvarez Miguel, Lucía Aranaz, David Guardado, Fernando Martínez Lavandera, Natalia González o María García Díaz.